سندھ میں سیلاب متاثرین کے لیے دس لاکھ مکانات کی تعمیر مکمل

سندھ کے سینئر صوبائی وزیر شرجیل انعام میمن نے کہا ہے کہ صوبے بھر میں سیلاب متاثرین کے لیے دس لاکھ مکانات کی تعمیر مکمل ہو چکی ہے۔ انہوں نے اپنے بیان میں بتایا کہ سندھ پیپلز ہاؤسنگ فاؤنڈیشن کے تحت 24 اضلاع میں دس لاکھ سے زائد گھر تعمیر کیے گئے ہیں، جن کا مقصد 2022 کے سیلاب سے بے گھر ہونے والے خاندانوں کو مستقل اور محفوظ رہائش فراہم کرنا ہے۔

انہوں نے کہا کہ سیلاب متاثرین کی بحالی کو اولین ترجیح بنایا گیا ہے اور یہ کام بلاول بھٹو زرداری کی ہدایات پر کیا جا رہا ہے۔ ضلعی سطح پر پیش رفت کے مطابق خیرپور میں سب سے زیادہ ایک لاکھ 67 ہزار 379 مکانات مکمل کیے گئے ہیں۔

شرجیل میمن کے مطابق نئے تعمیر شدہ گھروں کی ملکیت سیلاب متاثرہ خواتین کو دی جا رہی ہے۔ ان کا کہنا تھا کہ خواتین کو گھروں کی ملکیت کے حقوق دینے سے ان کے تحفظ اور خودمختاری کو تقویت ملے گی اور یہ اقدام سماجی طور پر بھی اہم ہے۔

وزیر نے بتایا کہ ہاؤسنگ منصوبے سے مقامی مزدوروں، مستریوں اور ہنرمند افراد کو روزگار کے مواقع ملے ہیں، جس سے دیہی علاقوں کی معیشت کو بھی سہارا ملا ہے۔ انہوں نے یقین دہانی کرائی کہ کسی بھی مستحق سیلاب متاثرہ خاندان کو گھر سے محروم نہیں رہنے دیا جائے گا اور مستحق افراد کی نشاندہی اور تعمیراتی معیار کو یقینی بنانے کے لیے جدید نظام کے ذریعے نگرانی جاری ہے۔

سینئر صوبائی وزیر نے کہا کہ سندھ حکومت سیلاب متاثرین کی مکمل بحالی تک اپنی کوششیں جاری رکھے گی اور رہائش کے علاوہ دیگر سہولیات کی فراہمی پر بھی توجہ دی جائے گی۔

یاد رہے کہ 2022 کے تباہ کن سیلاب نے سندھ کے بڑے حصے کو متاثر کیا تھا، جس کے بعد لاکھوں افراد بے گھر ہوئے تھے۔ حکومت کی جانب سے بتائی گئی اس پیش رفت کو متاثرہ آبادی کی طویل مدتی بحالی کے حوالے سے ایک اہم سنگ میل قرار دیا جا رہا ہے۔