اسلام آباد ہائیکورٹ: 26ویں آئینی ترمیم کے بعد وکلاء رٹ پٹیشن کی استدعا تک محدود رہیں

اسلام آباد ہائیکورٹ میں سید پور کو ماڈل ویلج بنانے اور سی ڈی اے کے آپریشن کے خلاف دائر کیس کی سماعت ہوئی، جس میں جسٹس راجہ انعام امین منہاس نے 26ویں آئینی ترمیم کا حوالہ دیا اور وکلاء کی حدود سے متعلق اہم ریمارکس دیے۔

عدالت نے واضح کیا کہ آئینی ترمیم کے بعد وکیل رٹ پٹیشن میں درج استدعا سے باہر نہیں جا سکتے۔ جسٹس راجہ انعام امین نے وکیل کو ہدایت کی کہ وہ اپنی استدعا تک محدود رہیں، یا پھر درخواست میں ترمیم کر کے نئی استدعا شامل کریں۔

جسٹس راجہ انعام امین نے مزید کہا کہ 26ویں ترمیم سے قبل عدالتوں میں استدعا سے باہر جانے کا رجحان پایا جاتا تھا، تاہم اب ایسا ممکن نہیں۔ انہوں نے زور دیا کہ آئینی ترمیم کے بعد وکلاء کو قانونی حدود کا سختی سے پاس و لحاظ رکھنا ہوگا۔

قبل ازیں، اسی کیس میں سید پور کے رہائشیوں نے سی ڈی اے کے آپریشن کو چیلنج کیا تھا، جس پر عدالت نے فریقین کے دلائل سنے۔ 26ویں آئینی ترمیم کے تحت عدالتی اختیارات میں تبدیلی کے بعد یہ واضح ہوتا ہے کہ رٹ پٹیشنز میں استدعا کی پابندی لازمی ہے۔

یاد رہے کہ 26ویں آئینی ترمیم کو حال ہی میں پارلیمنٹ سے منظور کیا گیا تھا، جس کے تحت عدلیہ کی تشکیل نو اور رٹ دائر کرنے کے طریقہ کار میں تبدیلیاں کی گئی ہیں۔ اس ترمیم کے بعد عدالتوں نے متعدد مواقع پر وکلاء کو استدعا کی پابندی کی ہدایت دی ہے۔