اسحاق ڈار کا مارگلہ ڈائیلاگ 2026 میں خطاب: مکہ معاہدہ کسی ملک کے خلاف نہیں

اسلام آباد میں مارگلہ ڈائیلاگ 2026 کا باقاعدہ آغاز ہو گیا، جس کا انعقاد اسلام آباد پالیسی ریسرچ انسٹیٹیوٹ کر رہا ہے اور جس میں مختلف ممالک کے سفیروں اور اہم شخصیات نے شرکت کی۔ اس سال ڈائیلاگ کا موضوع ’بدلتا ہوا عالمی نظام: اسٹریٹجک غیر یقینی صورتحال سے کیسے نمٹا جائے‘ مقرر کیا گیا ہے، جس کا مقصد بین الاقوامی، علاقائی اور ملکی سطح پر پالیسی سازوں کو معاونت فراہم کرنا ہے۔

افتتاحی تقریب سے خطاب کرتے ہوئے صدر آئی پی آر آئی لیفٹیننٹ جنرل (ر) ماجد احسان نے کہا کہ مارگلہ ڈائیلاگ پالیسی سازوں اور متنوع خیالات کے لیے ایک پلیٹ فارم بن چکا ہے۔ انہوں نے کہا کہ غزہ، افغانستان، یوکرین اور افریقہ میں جاری تنازعات بین الاقوامی نظام کی ناکامی کا ثبوت ہیں، اور یہ سوال اہم ہے کہ ان مسائل کے حل کے بعد دنیا میں کس قسم کا نظام قائم ہوگا۔

نائب وزیراعظم اور وزیر خارجہ سینیٹر اسحاق ڈار نے تقریب سے خطاب میں کہا کہ ابھرتی ہوئی دنیا کی منتقلی کے دوران زیادہ تعاون کی ضرورت ہے اور مارگلہ ڈائیلاگ کا موضوع پاکستان کو درپیش چیلنجز کا احاطہ کرتا ہے۔ ان کا کہنا تھا کہ پاکستان کے مفادات کا تحفظ بیرون ملک موثر سفارت کاری اور اندرونی طور پر مضبوطی سے ممکن ہے، جبکہ آج بڑی طاقتوں میں رقابت عروج پر ہے اور اقوام متحدہ جیسے اداروں کو سیاسی تقسیم کا سامنا ہے۔

انہوں نے کہا کہ خلیج اور بحیرہ احمر میں کشیدگی ظاہر کرتی ہے کہ علاقائی تنازعات کس طرح نظام کو درہم برہم کر سکتے ہیں۔ ان کا کہنا تھا کہ بایو ٹیکنالوجی سمیت جدید ٹیکنالوجیز ریاستوں کے بحرانوں سے نمٹنے کے طریقہ کار کو بدل رہی ہیں، اور پالیسی سازی کے وقت یہ بات مدنظر رکھی جانی چاہیے کہ ایک شعبے میں پیدا ہونے والا بحران دیگر شعبوں تک بھی پھیل سکتا ہے۔

وزیر خارجہ نے کہا کہ مکہ معاہدہ ایک دفاعی معاہدہ ہے اور یہ سعودی عرب اور ترکیہ کے ساتھ پاکستان کی شراکت داری کی علامت ہے، تاہم یہ کسی ملک کے خلاف نہیں ہے۔ انہوں نے کہا کہ اقتصادی سفارت کاری ان کی ذمہ داری ہے اور پاکستان تمام علاقائی شراکت داروں کے ساتھ بات چیت جاری رکھنا چاہتا ہے، جبکہ یورپی شراکت داروں کے ساتھ بھی رابطے جاری ہیں۔ ان کا کہنا تھا کہ مواصلاتی چینلز ہر حال میں کھلے رہنے چاہئیں اور سمندری راستے و حدود بلا روک ٹوک محفوظ تجارت کے لیے کھلے رکھے جائیں۔

انہوں نے مزید کہا کہ جنوبی ایشیا میں قیام امن صرف دوطرفہ عزت و احترام سے ممکن ہے اور جموں و کشمیر تنازعے کا حل سلامتی کونسل کی قراردادوں کے مطابق ہونا ضروری ہے۔ ان کا کہنا تھا کہ پاکستان پانی کو ہتھیار بنانے کی مخالفت کرتا ہے، اپنے شہریوں کا تحفظ جاری رکھے گا اور یہ یقینی بنائے گا کہ افغانستان کی سرزمین اس کے خلاف استعمال نہ ہو۔ انہوں نے کہا کہ چین کے ساتھ تزویراتی شراکت داری پاکستان کی خارجہ پالیسی کا اہم ستون ہے اور ابھرتے ہوئے نئے عالمی نظام میں ترقی کے لیے گلوبل ساؤتھ کی ضروریات کا خیال رکھنا ہوگا۔