کراچی پورٹ تا قیوم آباد کوریڈور کا منصوبہ منظور، 16.5 کلومیٹر طویل ایکسپریس وے تعمیر ہوگا

وزیراعلیٰ سندھ سید مراد علی شاہ کی زیر صدارت پبلک پرائیویٹ پارٹنرشپ پالیسی بورڈ کا 53واں اجلاس منعقد ہوا جس میں کراچی پورٹ تا قیوم آباد کوریڈور سے متعلق اہم منصوبے کی منظوری دی گئی۔ اجلاس میں بتایا گیا کہ اس منصوبے کے تحت 16.5 کلومیٹر طویل چار رویہ ایکسپریس وے تعمیر کیا جائے گا، جس کے ذریعے شاہراہِ بھٹو کو کراچی پورٹ کے ایسٹ وارف سے منسلک کیا جائے گا۔

اجلاس کو بریفنگ کے دوران بتایا گیا کہ اس کوریڈور پر رسائی کو کنٹرول کیا جائے گا تاکہ ٹریفک کی روانی بہتر رہے اور شہری علاقوں میں غیر ضروری داخلہ محدود ہو۔ منصوبے کے ٹھیکے کی مدت 27.5 سال مقرر کی گئی ہے جس میں ڈھائی سال تعمیر جبکہ 25 سال آپریشن اور دیکھ بھال شامل ہوں گے۔ یہ منصوبہ ڈیزائن، فنانس، تعمیر، آپریشن، دیکھ بھال اور منتقلی کی بنیاد پر مکمل کیا جائے گا۔

اجلاس میں منصوبے کی کمپنی میں کلاس اے ایکویٹی کی جگہ انفرا اسٹرکچر رئیل اسٹیٹ انویسٹمنٹ ٹرسٹ یعنی آر ای آئی ٹی متعارف کروانے کی تجویز بھی زیر غور آئی۔ اس کے علاوہ کراچی پورٹ ٹرسٹ کے لائسنس معاہدے اور حتمی این او سی کے اجرا سے متعلق امور پر بھی غور کیا گیا۔

وزیراعلیٰ سندھ نے شاہراہِ بھٹو ایکسپریس وے پر ندی کے کناروں کے تحفظ کے لیے کیے جانے والے کاموں کی بھی منظوری دی۔ ان کاموں میں پانی کے اندر تعمیر کیے جانے والے حفاظتی پشتے، میمن گوٹھ انٹرچینج نمبر 5 پر اضافی لوپ اور ریمپ کی تعمیر کے ساتھ ساتھ اسٹریٹ لائٹس کی تنصیب شامل ہے۔

ماہرین کے مطابق یہ منصوبہ کراچی بندرگاہ سے ملحقہ علاقوں اور شہر کے مرکزی راستوں کے درمیان رابطے کو مضبوط کرے گا، جس سے تجارتی ترسیل اور شہری نقل و حمل دونوں کو فائدہ پہنچنے کی توقع ہے۔ حکومت سندھ نے یہ منظوری ایسے وقت میں دی ہے جب صوبے میں بنیادی ڈھانچے کے منصوبوں پر خصوصی توجہ دی جا رہی ہے۔