کوہاٹ میں غیر قانونی پلیسر گولڈ مائننگ کے خلاف بڑا کریک ڈاؤن، 94 کلومیٹر علاقہ کلیئر

خیبرپختونخوا کے ضلع کوہاٹ میں غیر قانونی پلیسر گولڈ مائننگ کے خاتمے کے لیے ضلعی انتظامیہ اور متعلقہ محکموں کی مشترکہ کارروائیوں کا سلسلہ جاری ہے۔ حکومتی ذرائع کے مطابق اب تک تقریباً 94 کلومیٹر پر محیط علاقے کو غیر قانونی مائننگ کی سرگرمیوں سے کلیئر کر دیا گیا ہے۔

ذرائع نے بتایا کہ اس گرینڈ آپریشن کے دوران غیر قانونی مائننگ میں استعمال ہونے والی سپلائی لائنز کو بھی منقطع کیا گیا، تاکہ ان عناصر کی رسائی ممکنہ طور پر ختم کی جا سکے جو غیر قانونی طور پر قیمتی معدنیات نکالنے میں ملوث تھے۔

حکام کے مطابق غیر قانونی پلیسر گولڈ مائننگ میں ملوث افراد کے خلاف قانونی کارروائی کے لیے مقدمات درج کیے جا رہے ہیں اور کارروائی ضلع کوہاٹ سے اس سرگرمی کے مکمل خاتمے تک جاری رہے گی۔

ذرائع کا کہنا ہے کہ قدرتی وسائل کا تحفظ اور غیر قانونی مائننگ کی روک تھام نئی صوبائی حکومت اور ضلعی انتظامیہ کی ترجیحات میں شامل ہے۔ اس مقصد کے لیے محکموں کے درمیان ہم آہنگی کو مضبوط بنایا جا رہا ہے تاکہ غیر قانونی کان کنی کے نیٹ ورک کو مؤثر انداز میں بند کیا جا سکے۔

واضح رہے کہ پلیسر گولڈ مائننگ پاکستان کے شمالی علاقوں اور خیبرپختونخوا کے کئی اضلاع میں ایک اہم معاشی سرگرمی سمجھی جاتی ہے، تاہم غیر قانونی انداز میں کی جانے والی کان کنی سے قدرتی ماحول کو نقصان پہنچنے کے ساتھ ساتھ ریاستی محصولات کو بھی نقصان کا سامنا کرنا پڑتا ہے۔ ماہرین کے مطابق باقاعدہ لائسنسنگ اور نگرانی کے ذریعے اس شعبے کو قانونی دائرے میں لایا جا سکتا ہے۔

ضلعی انتظامیہ کی جانب سے کیے جانے والے اس آپریشن کو ماہرین نے قدرتی وسائل کے تحفظ اور قانون کی بالادستی کے لیے ایک مثبت اقدام قرار دیا ہے۔ توقع ہے کہ آئندہ ہفتوں میں کارروائی کا دائرہ مزید بڑھایا جائے گا۔