ٹرمپ نے نیٹلی اے بیکر کو پاکستان میں امریکی سفیر نامزد کر دیا

امریکی صدر ڈونلڈ ٹرمپ نے نیٹلی اے بیکر کو پاکستان میں امریکا کی نئی سفیر نامزد کر دیا ہے۔ اس نامزدگی کے بعد اسلام آباد میں تقریباً دو سال کے وقفے کے بعد امریکا کو مستقل سفیر ملنے کی راہ ہموار ہو گئی ہے، تاہم یہ تقرری امریکی سینیٹ کی توثیق سے مشروط ہے۔

نیٹلی اے بیکر جنوری 2025 سے پاکستان میں امریکی مشن کی سربراہ کے طور پر خدمات انجام دے رہی ہیں۔ وہ ستمبر میں ڈپٹی چیف آف مشن کی مدت مکمل ہونے کے بعد بھی قائم مقام امریکی سفیر کے طور پر کام کرتی رہیں، جس کے باعث سفارتی امور میں تسلسل برقرار رہا۔

قابل ذکر ہے کہ پاکستان میں امریکی سفارت خانے کے سربراہ کی مستقل تعیناتی کا معاملہ گزشتہ تقریباً دو سال سے التوا کا شکار تھا، اور مشن کی قیادت قائم مقام سفیر کے ذریعے کی جا رہی تھی۔ اب نامزدگی کے بعد سینیٹ کی منظوری کی صورت میں یہ خلا پُر ہونے کا امکان ہے۔

سفارتی حلقوں کے مطابق مستقل سفیر کی تعیناتی دونوں ممالک کے درمیان تجارت، سرمایہ کاری اور عوامی سطح کے رابطوں کو مضبوط بنانے میں معاون ثابت ہو سکتی ہے۔ پاکستان اور امریکا کے تعلقات میں معاشی تعاون اور علاقائی امور پر مشاورت اہمیت کی حامل رہی ہے۔

واضح رہے کہ امریکا میں سفیروں کی تعیناتی کا عمل صدر کی نامزدگی اور سینیٹ کی توثیق پر مشتمل ہوتا ہے، جس کے بعد ہی نامزد امیدوار باضابطہ طور پر اپنے فرائض سنبھالتا ہے۔ اس مرحلے کی تکمیل تک نیٹلی اے بیکر اپنی موجودہ ذمہ داریاں انجام دیتی رہیں گی۔