کراچی میں میڈیکل یونیورسٹی جانے والی طالبات سے اسنچنگ، سی سی ٹی وی فوٹیج سامنے آگئی

کراچی کے علاقے ابوالحسن اصفہانی روڈ پر صبح سویرے میڈیکل یونیورسٹی جانے والی طالبات کے ساتھ اسنچنگ کا واقعہ پیش آیا، جس کی سی سی ٹی وی فوٹیج سامنے آگئی ہے۔ فوٹیج کے مطابق طالبات بس کے انتظار میں کھڑی تھیں کہ اسی دوران دو موٹر سائیکل سوار ملزمان موقع پر پہنچ گئے۔

واقعے کے دوران ملزمان نے ایک طالبہ سے اس کا پرس چھین لیا، جبکہ دو دیگر طالبات نے بھاگ کر اپنی جان بچائی۔ فوٹیج میں دیکھا جا سکتا ہے کہ ایک طالبہ نے جان پر کھیل کر بھاگتے ہوئے سڑک عبور کی، جس کے بعد ملزمان موقع سے فرار ہو گئے۔

پولیس کے مطابق واقعے کے حوالے سے کسی بھی متاثرہ طالبہ نے اب تک پولیس سے رابطہ نہیں کیا، تاہم پولیس نے سی سی ٹی وی فوٹیج کی مدد سے ملزمان کی شناخت اور گرفتاری کے لیے کارروائی شروع کر دی ہے۔

واضح رہے کہ شہر قائد میں اس نوعیت کے واقعات نے شہریوں، خصوصاً خواتین اور طالبات کے تحفظ کے حوالے سے تشویش کو جنم دیا ہے۔ ماہرین کا کہنا ہے کہ عوامی مقامات پر سی سی ٹی وی کیمروں کی موجودگی اور پولیس گشت میں اضافہ ایسے جرائم کی روک تھام میں مددگار ثابت ہو سکتا ہے۔

دوسری جانب، سندھ پولیس کی جانب سے شہریوں کو ہدایت کی گئی ہے کہ وہ کسی بھی مشکوک سرگرمی کی فوری اطلاع متعلقہ تھانے یا ہیلپ لائن پر دیں تاکہ بروقت کارروائی کو یقینی بنایا جا سکے۔