کراچی کے نوجوان انجینئرز کا پانی سے ہائیڈروجن گیس پیدا کرنے والا مقامی الیکٹرولیسس جنریٹر تیار

کراچی کے نوجوان انجینئرز نے ایک اہم تکنیکی پیش رفت کرتے ہوئے پانی سے ہائیڈروجن گیس پیدا کرنے والا الیکٹرولیسس جنریٹر تیار کیا ہے۔ یہ جنریٹر مقامی طور پر تیار کیا گیا ہے اور اسے پاک ہائیڈرو نامی اسٹارٹ اپ نے ڈیزائن کیا ہے۔ اس ایجاد سے صنعتی، تجارتی اور گھریلو استعمال کے لیے توانائی کے نئے امکانات روشن ہوگئے ہیں۔

پاکستان اس وقت توانائی کے بحران، مہنگے درآمدی ایندھن اور صنعتی پیداواری لاگت میں اضافے کا سامنا کر رہا ہے۔ ایسے میں یہ مقامی حل مستقبل میں ملک کے توانائی کے منظرنامے میں اہم کردار ادا کرسکتا ہے۔ اس پروٹوٹائپ کی بنیادی خصوصیت یہ ہے کہ پانی کو الیکٹرولیسس کے عمل سے گزار کر ہائیڈروجن اور آکسیجن میں تقسیم کیا جاتا ہے، اور حاصل ہونے والی ہائیڈروجن کو فوری طور پر شعلے اور حرارت کی شکل میں استعمال کیا جاسکتا ہے۔

اس منصوبے کی قیادت محمد آیان کر رہے ہیں، جو سرسید یونیورسٹی آف انجینئرنگ اینڈ ٹیکنالوجی کے الیکٹریکل انجینئرنگ کے طالب علم اور پاک ہائیڈرو کے بانی و چیف ایگزیکٹو آفیسر ہیں۔ ٹیم میں ڈاکٹر عثمان الاؤالدین شریک بانی اور چیف ٹیکنالوجی آفیسر ہیں، جو این ای ڈی یونیورسٹی کے شعبہ مکینیکل انجینئرنگ میں پروفیسر ہیں، جبکہ امیر علی شریک بانی اور چیف آپریٹنگ آفیسر ہیں، جو سرسید یونیورسٹی کے شعبہ الیکٹریکل انجینئرنگ میں اسسٹنٹ پروفیسر کے فرائض انجام دے رہے ہیں۔

ڈاکٹر عثمان الاؤالدین کے مطابق موجودہ پروٹوٹائپ تقریباً 6 سے 8 منٹ میں ایک کلوگرام ہائیڈروجن گیس پیدا کرسکتا ہے، جس کے لیے تقریباً 8 سے 10 لیٹر پانی استعمال ہوتا ہے۔ بجلی کی کھپت اور پیداواری لاگت کا انحصار جنریٹر کی استعداد اور مسلسل آپریشن پر ہوگا۔ ان کا کہنا ہے کہ اگر بجلی کی ضرورت شمسی توانائی سے پوری کی جائے تو اس نظام کو قابل تجدید توانائی کے ذریعے چلایا جاسکتا ہے۔

پاکستان میں چھوٹے صنعتی یونٹس، دھاتوں کی تیاری و ویلڈنگ، ٹیکسٹائل، بیکریوں اور تندوروں سمیت دیگر کاروباری شعبوں میں حرارت کی مسلسل ضرورت رہتی ہے، جہاں ایل پی جی اور قدرتی گیس کی قیمتوں میں اضافے سے پیداواری لاگت بڑھ رہی ہے۔ پاک ہائیڈرو کی ٹیم کے مطابق ہائیڈروجن ٹارچ سسٹم ان شعبوں کے لیے مقامی متبادل بننے کی صلاحیت رکھتا ہے۔

ہائیڈروجن گیس انتہائی آتش گیر ہوتی ہے، اس لیے اس کے استعمال میں حفاظت بنیادی تقاضا ہے۔ تیار کردہ جنریٹر میں متعدد حفاظتی اقدامات شامل کیے گئے ہیں۔ منصوبے کے خالق محمد آیان کے مطابق ہائیڈروجن کو بڑی مقدار میں ذخیرہ کرنے کے بجائے ضرورت کے مطابق پیدا کرنا اس نظام کی اہم خصوصیت ہے، جس سے گیس ذخیرہ کرنے کے بعض خطرات کم کرنے میں مدد مل سکتی ہے۔ تاہم گیس کی پیداوار، ترسیل اور شعلے تک پہنچنے کے تمام مراحل میں حفاظتی انتظامات ضروری ہیں۔

یہ دیکھنا باقی ہے کہ پانی سے تیار ہونے والی ہائیڈروجن واقعی سستی توانائی ثابت ہوتی ہے یا نہیں، کیونکہ اس کی لاگت کا انحصار بجلی کی قیمت اور نظام کی کارکردگی پر ہوگا۔ ماہرین کے مطابق اگر اسے شمسی توانائی جیسے سستے ذرائع سے جوڑا جائے تو یہ مستقبل میں توانائی کے پائیدار حل کے طور پر ابھر سکتا ہے۔