این ویڈیا کے سربراہ کا ذاتی معاملے کا اعتراف، کمپنی نے تحقیقات کا اعلان کر دیا

امریکی ٹیکنالوجی کمپنی این ویڈیا کے سربراہ جینسن ہوانگ نے اپنے ایک ذاتی معاملے کا کھلے عام اعتراف کیا ہے اور اس کی مکمل ذمہ داری قبول کی ہے۔ یہ معاملہ ایسے وقت سامنے آیا ہے جب کمپنی نے ان خبروں کی تحقیقات کا اعلان کیا ہے جن میں یہ دعویٰ کیا گیا تھا کہ وہ کسی غیر ملکی خفیہ ادارے کی کارروائی کا ہدف بنے تھے۔

کمپنی کی جانب سے ملازمین کو بھیجے گئے ایک پیغام میں 63 سالہ ہوانگ نے کہا کہ انہوں نے اپنے خاندان کو تکلیف پہنچائی ہے اور وہ اس بات کا اعتراف کرتے ہیں کہ ان سے بے وفائی ہوئی۔ انہوں نے متعلقہ شخصیت کا نام نہیں بتایا، تاہم واضح کیا کہ وہ اپنے کیے کی ذمہ داری قبول کرتے ہیں اور اس حوالے سے ہونے والی تنقید کو بھی برداشت کریں گے۔

یہ پیش رفت سنگاپور کی ٹیکنالوجی کمپنی میگا اسپیڈ کی ایک ایگزیکٹو ایلس ہوانگ کے ساتھ جینسن ہوانگ کے مبینہ قریبی تعلقات کی خبروں کے تناظر میں سامنے آئی ہے۔ امریکی میڈیا کے متعدد اداروں نے رپورٹ کیا ہے کہ امریکی حکام کو شبہ ہے کہ ایلس ہوانگ نے چین کو خفیہ معلومات فراہم کیں اور جدید مصنوعی ذہانت کے چپس چین بھیجنے میں مدد کی۔

دوسری جانب این ویڈیا نے اتوار کو ایک پریس ریلیز جاری کرتے ہوئے بتایا کہ اس معاملے کی تحقیقات کی نگرانی کمپنی کے آزاد ڈائریکٹرز پر مشتمل ایک کمیٹی اور بیرونی قانونی ماہرین کریں گے۔ بیان کے مطابق بورڈ امریکی قومی اور معاشی سلامتی کو اولین ترجیح دیتا ہے، کیونکہ یہ معاملہ کمپنی اور اس کے حصص یافتگان کے مفادات کے لیے انتہائی اہم ہے۔

کمپنی کے بورڈ نے تاہم یہ واضح کیا کہ اس کے پاس فی الحال یہ ماننے کی کوئی وجہ نہیں کہ قومی سلامتی یا این ویڈیا کی خفیہ معلومات سے کسی قسم کا سمجھوتہ ہوا ہے۔ جینسن ہوانگ نے بھی اپنے پیغام میں کہا کہ وہ کمپنی کی حفاظت اور امریکی قومی سلامتی کے تحفظ کے لیے پُرعزم ہیں اور کمپنی کی زیرِ نگرانی تحقیقات کی مکمل حمایت کرتے ہیں۔

واضح رہے کہ این ویڈیا کو دنیا کی دوسری سب سے بڑی کمپنی اور مصنوعی ذہانت کی ترقی کی علامت سمجھا جاتا ہے۔ یہ معاملہ ایسے وقت سامنے آیا ہے جب امریکا اور چین ٹیکنالوجی کے میدان میں ایک دوسرے سے آگے نکلنے کی دوڑ میں مصروف ہیں، اور ماہرین کے مطابق اس تنازعے سے کمپنی پر اعتماد کو نقصان پہنچنے کا امکان ہے۔