راولاکوٹ میں فائرنگ سے زخمی سندھ رینجرز کا نائیک شہید

راولاکوٹ میں گزشتہ روز آزاد جموں و کشمیر پولیس کی چوکی پر کالعدم تنظیم کے مسلح افراد کی فائرنگ کے نتیجے میں زخمی ہونے والے سندھ رینجرز کے نائیک بوستان خان نے علاج کے دوران دم توڑ دیا۔ یہ واقعہ پانچ نومبر کو پیش آیا تھا جس میں رینجرز کا اہلکار شدید زخمی ہوا تھا۔

آزاد کشمیر پولیس کے ترجمان کے مطابق شہید نائیک بوستان خان کا تعلق ضلع کوہاٹ سے تھا اور وہ سندھ رینجرز کے اہلکار تھے۔ انہیں آزاد جموں و کشمیر پولیس کی درخواست پر امن و امان کی بحالی اور قانون نافذ کرنے والے اداروں کی معاونت کے لیے تعینات کیا گیا تھا۔

ترجمان نے واقعے کی مذمت کرتے ہوئے کہا کہ یہ افسوسناک واقعہ ایک بار پھر کالعدم تنظیم کے مسلح عناصر کے پرتشدد رویے کو ظاہر کرتا ہے جو عوامی حقوق کی آڑ میں قانون نافذ کرنے والے اداروں کو مسلسل نشانہ بنا رہے ہیں اور خطے کے امن و استحکام کو نقصان پہنچا رہے ہیں۔ انہوں نے کہا کہ قانون نافذ کرنے والے اہلکار عوام کے جان و مال کے تحفظ کے لیے اپنی ذمہ داریاں ادا کرتے ہوئے قیمتی جانوں کا نذرانہ پیش کر رہے ہیں اور نائیک بوستان خان کی شہادت اسی تسلسل کا حصہ ہے۔

آزاد کشمیر پولیس کے ترجمان نے شہید کے اہل خانہ سے دلی تعزیت کا اظہار کیا اور کہا کہ ایسی بزدلانہ کارروائیاں قانون نافذ کرنے والے اداروں کے حوصلے پست نہیں کر سکتیں۔ ریاست عوام کے تحفظ، امن و امان کی بحالی اور قانون کی عمل داری کو ہر صورت یقینی بنانے کے لیے پرعزم ہے اور ایسے حملوں میں ملوث عناصر کو قانون کے مطابق انصاف کے کٹہرے میں لایا جائے گا۔

واضح رہے کہ یہ واقعہ راولاکوٹ میں پولیس چوکی پر حملے کی شکل میں پیش آیا تھا جس کے بعد زخمی اہلکار کو طبی امداد کے لیے منتقل کیا گیا تھا لیکن وہ جانبر نہ ہو سکے۔ اس قسم کے حملے قانون نافذ کرنے والے اداروں کے لیے ایک سنگین چیلنج ہیں جن پر قابو پانے کے لیے سکیورٹی اقدامات کو مزید مؤثر بنانے کی ضرورت ہے۔