شادی نہ ہونے پر رقم واپس: چینی ڈیٹنگ ایپ کی منفرد پیشکش

چین میں ایک ڈیٹنگ ایپ نے شادی کے خواہشمند افراد کے لیے منفرد پیشکش متعارف کرائی ہے، جس کے مطابق اگر صارف تین سال کے اندر شادی نہیں کر پاتا تو اسے ادا کی گئی فیس واپس کر دی جائے گی۔ یہ اعلان سوشل میڈیا پر وسیع پیمانے پر زیر بحث آیا ہے۔

غیر ملکی میڈیا رپورٹس کے مطابق 'لیانگپائی اے آئی' نامی ایپ کی سالانہ ممبرشپ فیس 2,000 چینی یوآن ہے۔ عام ڈیٹنگ ایپس کے برعکس، اس ایپ میں صارف کو ایک وقت میں صرف ایک شخص سے رابطے کی سہولت دی جاتی ہے تاکہ دونوں ایک دوسرے کو بہتر طور پر سمجھ سکیں۔

ایپ پر رجسٹریشن کے عمل کے دوران صارف کو مصنوعی ذہانت سے بیس منٹ تک گفتگو کرنی ہوتی ہے، جس میں تعلیم، ملازمت، دلچسپیوں، شخصیت اور شریکِ حیات سے متعلق توقعات کے بارے میں معلومات حاصل کی جاتی ہیں۔ اس سے ایپ صارف کے لیے موزوں ساتھی تلاش کرنے میں مدد لیتی ہے۔

رپورٹس کے مطابق ایپ پر اب تک 35 ہزار سے زائد افراد رجسٹرڈ ہو چکے ہیں، جبکہ اس کی کامیابی کی شرح تقریباً 9 فیصد بتائی گئی ہے، یعنی تقریباً نو فیصد صارفین اس کے ذریعے کامیاب رشتہ قائم کر پاتے ہیں۔

یہ پیشکش ایسی صورتحال میں سامنے آئی ہے جب چین میں آن لائن ڈیٹنگ ایپس کا رجحان بڑھ رہا ہے اور نوجوان نسل رشتہ تلاش کرنے کے لیے ٹیکنالوجی کا استعمال کر رہی ہے۔ تاہم، شادی نہ ہونے پر رقم واپسی کی ضمانت ایک نیا اور دلچسپ اقدام ہے جس نے صارفین کی توجہ مبذول کی ہے۔