سینڈ پیپر اسکینڈل: عثمان خواجہ کے انکشافات کے بعد کرکٹ آسٹریلیا کا مؤقف سامنے آ گیا

آسٹریلوی ٹیسٹ کرکٹر عثمان خواجہ کی جانب سے 2018 کے بال ٹیمپرنگ اسکینڈل سے متعلق نئے انکشافات سامنے آنے کے بعد کرکٹ آسٹریلیا نے اس معاملے پر اپنا مؤقف واضح کر دیا ہے۔ کرکٹ آسٹریلیا کے چیف ایگزیکٹو نے اس امکان کو مسترد کیا ہے کہ اس واقعے کی دوبارہ تحقیقات کرائی جائیں گی۔

عثمان خواجہ نے اپنی نئی سوانح عمری میں یہ دعویٰ کیا ہے کہ اس وقت پوری آسٹریلوی ٹیم کو اس منصوبے کا علم تھا جس کے تحت گیند کو سینڈ پیپر سے رگڑ کر ریورس سوئنگ حاصل کرنے کی کوشش کی گئی تھی۔ یہ واقعہ 2018 میں جنوبی افریقا کے خلاف کیپ ٹاؤن میں کھیلے گئے ٹیسٹ میچ کے دوران پیش آیا تھا۔

واقعے کے وقت صرف کیمرون بینکرافٹ، اس وقت کے کپتان اسٹیو اسمتھ اور نائب کپتان ڈیوڈ وارنر کے خلاف کارروائی کی گئی تھی۔ بینکرافٹ ٹیلی ویژن کیمروں میں گیند سے چھیڑ چھاڑ کرتے ہوئے پکڑے گئے تھے، جس کے بعد انہیں نو ماہ جبکہ اسمتھ اور وارنر کو ایک ایک سال کی پابندی کا سامنا کرنا پڑا تھا۔

ٹیم کے دیگر کھلاڑیوں نے اس معاملے کی ذمہ داری قبول نہیں کی تھی۔ موجودہ کپتان پیٹ کمنز، مچل اسٹارک، جوش ہیزل ووڈ اور نیتھن لائن پر مشتمل بولنگ یونٹ نے 2021 میں ایک مشترکہ بیان جاری کرتے ہوئے اسکینڈل کے منصوبے سے لاعلمی کا اظہار کیا تھا۔ تاہم عثمان خواجہ کے اس دعوے کے بعد کہ پوری ٹیم کو اس منصوبے کا علم تھا، ان کھلاڑیوں کے سابقہ موقف پر بھی سوالات اٹھنے لگے ہیں۔

ادھر ڈیوڈ وارنر نے اپنے سابق ساتھی کھلاڑی عثمان خواجہ کے دعوے کی مکمل حمایت کرتے ہوئے کہا ہے کہ وہ ان کی بات سے سو فیصد متفق ہیں۔ واضح رہے کہ یہ معاملہ آسٹریلوی کرکٹ کی تاریخ کے متنازع ترین واقعات میں شمار ہوتا ہے، اور اس پر بحث کا سلسلہ تازہ انکشافات کے بعد ایک بار پھر گرم ہو گیا ہے۔

کرکٹ آسٹریلیا کی جانب سے دوبارہ تحقیقات سے انکار کے باوجود، عثمان خواجہ کے انکشافات نے اس بحث کو جنم دیا ہے کہ کھیل کی روح کے تحفظ اور شفافیت کے لیے اس نوعیت کے واقعات کی مکمل چھان بین ضروری ہے۔ ماہرین کے مطابق اس معاملے پر کھلاڑیوں کے متضاد بیانات کرکٹ کے عالمی تشخص اور ادارہ جاتی احتساب پر سوالات اٹھا سکتے ہیں۔