ترکیہ کی اسٹیل فیکٹری میں دھماکا اور آتشزدگی: 17 مزدور جاں بحق، 12 زخمی

ترکیہ کے مغربی شہر ازمیر کے قریب واقع لوہے اور اسٹیل پیدا کرنے والی ایک فیکٹری میں خوفناک دھماکے اور آتشزدگی کے نتیجے میں کم از کم سترہ مزدور جاں بحق اور بارہ زخمی ہوگئے ہیں۔ حکام کے مطابق ملبے تلے مزید افراد کی موجودگی کا خدشہ بھی ظاہر کیا جا رہا ہے، جس کے باعث ہلاکتوں کی تعداد میں اضافے کا امکان ہے۔

غیر ملکی خبر رساں اداروں کے مطابق یہ حادثہ علی آغا کے علاقے میں واقع حباش دمیر چیلک اسٹیل پلانٹ میں اس وقت پیش آیا جب ایک کرین متبادل بوائلر منتقل کر رہی تھی اور اچانک گر گئی۔ کرین پر موجود بھاری سامان نیچے موجود بھٹی میں جا گرا، جس کے نتیجے میں شدید دھماکا ہوا اور فیکٹری میں آگ بھڑک اٹھی۔

عینی شاہدین کے مطابق دھماکا اتنا شدید تھا کہ زمین لرز اٹھی اور ابتدا میں لوگوں کو زلزلے کا گمان ہوا۔ واقعے کے بعد فیکٹری سے بلند ہوتے شعلوں اور دھویں کے بادلوں نے ارد گرد کے علاقے کو اپنی لپیٹ میں لے لیا، جبکہ فیکٹری انتظامیہ کا کہنا ہے کہ حادثہ پلانٹ کی الیکٹرک آرک فرنس کی طے شدہ مرمت کے دوران پیش آیا۔

ترکیہ کے صدر رجب طیب اردوان نے واقعے میں ہلاکتوں کی تصدیق کرتے ہوئے کہا ہے کہ حادثے کی تحقیقات شروع کر دی گئی ہیں اور امدادی کارروائیاں جاری ہیں۔ وزیر صحت کمال میمیش اوغلو کے مطابق شدید زخمی ہونے والا ایک شخص دوران علاج دم توڑ گیا، جس کے بعد ہلاکتوں کی تعداد سترہ ہوگئی۔

ازمیر کے گورنر سلیمان البان نے خدشہ ظاہر کیا ہے کہ بعض افراد اب بھی ملبے تلے دبے ہو سکتے ہیں، جبکہ مقامی میڈیا رپورٹس کے مطابق واقعے کے سلسلے میں کم از کم پانچ افراد کو گرفتار بھی کیا گیا ہے۔ واضح رہے کہ یہ صنعتی حادثہ ترکیہ کے اسٹیل شعبے میں حالیہ برسوں کے سنگین ترین واقعات میں شمار کیا جا رہا ہے، اور حکام نے واقعے کی مکمل تحقیقات اور ذمہ داروں کے خلاف کارروائی کا یقین دلایا ہے۔