امریکی وزیر دفاع پیٹ ہیگسیتھ کے خلاف مواخذے کی قرارداد کانگریس میں پیش، بدھ کو ووٹنگ متوقع

امریکی وزیر دفاع پیٹ ہیگسیتھ کے خلاف مواخذے کی قرارداد امریکی کانگریس میں پیش کر دی گئی ہے، جس پر ایوان نمائندگان میں بدھ کے روز ووٹنگ متوقع ہے۔ یہ قرارداد ریپبلکن رکن کانگریس تھامس میسی نے پیش کی، جنہوں نے وزیر دفاع پر جنگی اختیارات کی خلاف ورزی کا الزام عائد کیا۔

تھامس میسی نے ایوان نمائندگان کے اجلاس میں مواخذے کے حق میں اپنے الزامات تفصیل سے پڑھ کر سنائے۔ ادھر ڈیموکریٹ رہنما حکیم جیفریز نے بھی امریکی وزیر دفاع کے مواخذے کی حمایت کا اعلان کر دیا ہے، جس سے اس کارروائی کو دو جماعتوں کی توجہ حاصل ہو گئی ہے۔

دوسری جانب پیٹ ہیگسیتھ نے مواخذے کی قرارداد پر اپنا ردعمل پیش کرنے کے لیے آج پینٹاگون میں پریس کانفرنس کرنے کا اعلان کیا ہے۔ ان کا کہنا ہے کہ وہ اس موقع پر مواخذے سے متعلق تفصیلی بات کریں گے اور اس کارروائی میں ریپبلکن ارکان کی مخالفت سے انہیں کوئی پریشانی نہیں۔

ایران کے حوالے سے وزیر دفاع نے اپنے موقف کا دفاع کرتے ہوئے کہا کہ محاذ آرائی کا فیصلہ اگرچہ غیر مقبول تھا لیکن ضروری تھا، کیونکہ ایرانی حکومت کا سامنا کرنا ناگزیر تھا۔ ان کے مطابق امریکی عوام جنگ میں فتح سے کم کچھ قبول نہیں کریں گے اور ایران کو جوہری بم رکھنے کی اجازت نہیں دی جا سکتی۔

ہیگسیتھ نے مزید کہا کہ تاریخ صدر ڈونلڈ ٹرمپ کے اقدامات کا مثبت انداز میں جائزہ لے گی۔ یاد رہے کہ صدر ٹرمپ نے ایران کے ساتھ جنگ دوبارہ شروع ہونے کے امکان کو انتہائی کم قرار دیا ہے، جبکہ امریکا کی جانب سے عراق پر دباؤ ڈالا جا رہا ہے کہ وہ ایران کے بیشتر سرحدی راستے بند کرے۔

کانگریس میں مواخذے کی قرارداد پر بدھ کو ہونے والی ووٹنگ کو امریکی وزیر دفاع کے سیاسی مستقبل کے حوالے سے اہم پیش رفت قرار دیا جا رہا ہے۔ ماہرین کے مطابق اس ووٹنگ کے نتائج نہ صرف وزیر دفاع کی ذاتی حیثیت بلکہ امریکی دفاعی پالیسی کی سمت پر بھی اثر انداز ہو سکتے ہیں۔