ٹرمپ کا ملک بدری کی سخت پالیسیوں پر نظرثانی کا اشارہ، سیاسی نقصان کا اعتراف

امریکی صدر ڈونلڈ ٹرمپ نے غیر قانونی تارکینِ وطن کی ملک بدری سے متعلق اپنی سخت پالیسی پر نظرثانی کا عندیہ دیتے ہوئے اعتراف کیا ہے کہ ان کی انتظامیہ نے بعض معاملات میں ضرورت سے زیادہ سختی سے کام لیا، جس کا انہیں سیاسی طور پر نقصان بھی اٹھانا پڑا۔ یہ بیان ایسے وقت میں سامنے آیا ہے جب ملکی سیاست میں اس پالیسی پر بحث جاری ہے۔

امریکی ٹی وی چینل سی بی ایس کے پروگرام ’60 منٹس‘ کو دیے گئے انٹرویو میں ٹرمپ نے کہا کہ ملک بدری کی پالیسی بہت سخت تھی اور بالآخر اس کا سیاسی نقصان انہیں بھگتنا پڑا۔ ان کا یہ بیان 2026ء کے وسط مدتی انتخابات میں ری پبلکن پارٹی کو کانگریس کے دونوں ایوانوں میں شکست کے بعد سامنے آیا ہے۔

ٹرمپ نے کہا کہ سرحدوں کی حفاظت اور جرائم پیشہ افراد کو ملک سے نکالنے کے معاملے میں ان کی حکومت کو اچھے نمبر ملنے چاہئیں، تاہم مسئلہ اس وقت پیدا ہوا جب ایسے تارکینِ وطن کو بھی ملک بدر کیا گیا جو کئی برسوں سے امریکا میں مقیم تھے اور ہوٹلوں، صفائی، ریستورانوں اور دیگر شعبوں میں کام کر رہے تھے۔

انہوں نے اعتراف کیا کہ ایسے افراد کی ملک بدری سے عوام میں ناراضی پیدا ہوئی اور اس کا سیاسی اثر بھی پڑا۔ ان کے مطابق طویل عرصے سے مقیم محنت کش تارکینِ وطن کے خلاف کارروائی نے عام شہریوں کے روزگار اور معاشی مفادات کو بھی متاثر کیا۔

یاد رہے کہ ملک بدری کی سخت پالیسی امریکی سیاست میں متنازع موضوع رہی ہے اور اس پر مختلف حلقوں کی جانب سے مسلسل تنقید کی جاتی رہی ہے۔ ٹرمپ کے اس اعتراف کو سیاسی مبصرین اس پالیسی میں نرمی یا نظرثانی کی جانب ایک اہم اشارہ قرار دے رہے ہیں۔