وزیراعظم شہباز شریف کا غزہ میں انسانی بحران پر شدید تشویش کا اظہار

وزیراعظم شہباز شریف نے غزہ کی موجودہ انسانی صورتحال پر شدید تشویش کا اظہار کیا ہے۔ ان کا کہنا ہے کہ غزہ کے بہادر فلسطینی عوام کو بنیادی انسانی امداد فراہم کرنے سے روکنے کے لیے اسرائیل کی جانب سے جاری غیر قانونی اقدامات انتہائی تشویشناک ہیں اور ان کی شدید مذمت کی جاتی ہے۔

سماجی رابطے کی ویب سائٹ ایکس پر جاری اپنے پیغام میں وزیراعظم نے کہا کہ غزہ سے ایسے دل دہلا دینے والے مناظر سامنے آ رہے ہیں جن میں خیمے پانی میں ڈوبتے ہوئے دیکھے جا سکتے ہیں، جبکہ وہاں کے بچے جن کے پاس جانے کی کوئی اور جگہ نہیں، پھنس کر رہ گئے ہیں اور بھوک اور شدید سردی کا سامنا کر رہے ہیں۔

وزیراعظم نے واضح کیا کہ وہ جنگ بندی کی خلاف ورزیوں اور بین الاقوامی قانون کی پامالی کے ساتھ ساتھ فلسطینی عوام کے خلاف جاری جارحیت کی بھی شدید مذمت کرتے ہیں۔ انہوں نے کہا کہ اس سلسلے میں انہوں نے وزارتِ خارجہ کو ہدایت دی ہے کہ وہ انسانی امداد میں فوری اضافے کے لیے تمام ممکنہ ذرائع بروئے کار لائے۔

یاد رہے کہ غزہ میں جاری بحران کے باعث لاکھوں افراد بے گھر ہو چکے ہیں اور انسانی امداد کی فراہمی میں رکاوٹوں کے سبب عام شہریوں، خصوصاً بچوں اور خواتین کی مشکلات میں مسلسل اضافہ ہو رہا ہے۔ سردیوں کے آغاز کے ساتھ ہی بے گھر خاندانوں کے لیے صورتحال مزید سنگین ہو گئی ہے۔

ماہرین اور انسانی حقوق کی تنظیمیں طویل عرصے سے غزہ میں فوری جنگ بندی اور بلا رکاوٹ انسانی امداد کی فراہمی پر زور دے رہی ہیں۔ پاکستان کی جانب سے اس معاملے پر عالمی برادری سے بھی فوری اور مؤثر اقدامات کی اپیل کی جا رہی ہے تاکہ متاثرہ آبادی کو بنیادی سہولیات کی فراہمی کو یقینی بنایا جا سکے۔