پاکستان معدنی شعبے میں عالمی سرمایہ کاری کے لیے نئی راہیں کھولنے کو تیار

پاکستان اپنے وسیع معدنی وسائل کی بدولت عالمی کان کنی کمپنیوں اور بین الاقوامی سرمایہ کاری کے لیے نئی راہیں کھولنے کی تیاری کر رہا ہے۔ اس سلسلے میں پاکستان منرلز انویسٹمنٹ فورم 12 اور 13 نومبر کو اسلام آباد میں منعقد کیا جائے گا، جس کا اہتمام ایس آئی ایف سی کے اشتراک سے کیا جا رہا ہے۔

یو ای ٹی لاہور کے شعبہ مائننگ انجینئرنگ کے چیئرمین پروفیسر ڈاکٹر ذوالفقار علی کے مطابق فورم میں اختراعات، تحقیق اور عالمی شراکت داریوں کے فروغ پر خصوصی توجہ دی جائے گی۔ انہوں نے بتایا کہ پاکستان کے معدنی شعبے کی ترقی کے لیے جدید تحقیق، مقامی مہارتوں اور جدت کو اجاگر کیا جائے گا اور عالمی سرمایہ کاروں و صنعتی اداروں کے ساتھ بامقصد تعاون کے مواقع تلاش کیے جائیں گے۔

پروفیسر ڈاکٹر ذوالفقار علی کا کہنا تھا کہ پاکستان کے معدنی شعبے کا مستقبل صرف قدرتی وسائل پر نہیں بلکہ عوام کے علم، مہارت اور جدت پر بھی منحصر ہے۔ فورم کے ذریعے ملکی معدنی شعبے کو درپیش چیلنجز پر سنجیدہ غور و فکر اور بین الاقوامی تجربے سے استفادے کی راہ ہموار ہوگی۔

فورم میں کینیڈا کی شرکت اس بات کی عکاسی کرتی ہے کہ عالمی سرمایہ کار پاکستان کے معدنی شعبے میں گہری دلچسپی رکھتے ہیں۔ کینیڈین ہائی کمشنر کے مطابق یہ فورم جدید مائننگ ٹیکنالوجی اور پائیدار کان کنی کے فروغ کا اہم موقع ہے، اور مائننگ ویلیو چین میں چار ہزار سے زائد کینیڈین کمپنیاں سرگرم ہیں۔

کینیڈا اپنی کمپنیوں کے ذریعے پاکستان میں جدید ٹیکنالوجی متعارف کرانے کا خواہاں ہے، جس سے معدنی شعبے میں سرمایہ کاری اور تکنیکی صلاحیت میں اضافہ متوقع ہے۔ ماہرین کے مطابق اس طرح کے فورمز ملکی معیشت کے لیے غیر ملکی سرمایہ کاری، روزگار کے مواقع اور معدنی وسائل کی بہتر قدر بندی کا سبب بن سکتے ہیں۔

واضح رہے کہ فورم کا انعقاد حکومت کی جانب سے معدنی شعبے کو ترجیحی شعبہ قرار دینے اور عالمی سطح پر پاکستان کی معاشی کشش بڑھانے کی کوششوں کا حصہ ہے۔ اس موقع پر جدید ٹیکنالوجی کے تبادلے، پائیدار کان کنی کے اصولوں اور مقامی صلاحیتوں کی تعمیر پر بھی بات کی جائے گی۔