ریاض میں اچانک فضائی خطرے کا الرٹ جاری، چند منٹ بعد واپس لے لیا گیا

سعودی عرب کے دارالحکومت ریاض میں اتوار کے روز اچانک فضائی خطرے کا الرٹ جاری کیا گیا جس کے بعد شہریوں کو موبائل فون پر ہنگامی پیغام بھیجا گیا کہ وہ فوری طور پر گھروں کے اندر یا محفوظ مقامات پر منتقل ہو جائیں۔ یہ انتباہ سعودی سول ڈیفنس کی جانب سے بھیجا گیا تھا جس میں شہریوں کو پرسکون رہنے اور کھڑکیوں اور دروازوں سے دور رہنے کی ہدایت کی گئی۔

پیغام میں واضح طور پر کہا گیا تھا کہ متعلقہ علاقے کو فضائی خطرے کا سامنا ہے اور شہریوں کو چاہیے کہ وہ سعودی سول ڈیفنس کی ہدایات پر عمل کریں اور کسی بھی غیر ضروری نقل و حرکت سے گریز کریں۔ تاہم چند منٹ کے بعد یہ الرٹ واپس لے لیا گیا اور حکام کی جانب سے اس حوالے سے مزید وضاحت نہیں دی گئی۔

ابھی تک یہ واضح نہیں ہو سکا کہ اس فضائی خطرے کی نوعیت کیا تھی، ممکنہ ہدف کیا تھا یا آیا کسی میزائل یا ڈرون کی موجودگی کا شبہ تھا۔ سعودی حکام نے الرٹ جاری کرنے اور بعد میں واپس لینے کی وجوہات کے بارے میں کوئی تفصیل فراہم نہیں کی۔

واضح رہے کہ سعودی عرب پہلے بھی فضائی حملوں کا نشانہ بنتا رہا ہے، خاص طور پر یمن کی حوثی ملیشیا کی جانب سے میزائل اور ڈرون حملے کیے جاتے رہے ہیں۔ تاہم اس تازہ الرٹ کے حوالے سے کوئی بھی فریق فوری طور پر ذمہ داری قبول نہیں کی۔

ماہرین کا کہنا ہے کہ اس طرح کے ہنگامی الرٹس کا مقصد عوام کو ممکنہ خطرے سے آگاہ کرنا اور انہیں محفوظ رکھنا ہوتا ہے، لیکن اگر یہ غلطی سے جاری ہو جائیں تو عوام میں خوف و ہراس پھیل سکتا ہے۔ سعودی حکام کی جانب سے اس واقعے کی تحقیقات کی جا سکتی ہیں تاکہ آئندہ ایسی صورتحال سے نمٹا جا سکے۔

خیال رہے کہ یہ واقعہ ایسے وقت میں پیش آیا ہے جب خطے میں کشیدگی کے آثار موجود ہیں اور سعودی عرب اپنی فضائی دفاعی صلاحیتوں کو مضبوط بنانے پر کام کر رہا ہے۔ تاہم حکام نے اس الرٹ کو کسی بڑے واقعے سے جوڑنے سے گریز کیا ہے۔