شمالی وزیرستان میں سیکیورٹی فورسز کی کارروائی، مساجد میں چھپایا گیا دھماکا خیز مواد اور اسلحہ برآمد

شمالی وزیرستان کے علاقے میر علی کے جنوبی نواحی گاؤں موزک میں سیکیورٹی فورسز نے خفیہ معلومات کی بنیاد پر کارروائی کرتے ہوئے دہشت گردوں کے دو ٹھکانے کلیئر کیے ہیں۔ پاک فوج کے شعبہ تعلقات عامہ (آئی ایس پی آر) کے مطابق یہ ٹھکانے مساجد کے اندر قائم کیے گئے تھے، جہاں سے بڑی تعداد میں تیار شدہ دیسی ساختہ دھماکا خیز آلات، دھماکا خیز مواد تیار کرنے کا سامان، اسلحہ اور گولہ بارود برآمد کیا گیا۔

آئی ایس پی آر نے بتایا کہ دہشت گرد دھماکا خیز مواد ذخیرہ کرنے کے لیے جان بوجھ کر عبادت گاہوں کو اپنے ٹھکانوں کے طور پر استعمال کر رہے تھے۔ ان مقامات پر تشدد کے مراکز بھی قائم کیے گئے تھے، جہاں لوگوں کو تشدد کا نشانہ بنایا جاتا تھا۔ فوج کے ترجمان کے مطابق عبادت گاہوں کی اس طرح بے حرمتی اس بات کا واضح ثبوت ہے کہ یہ عناصر اسلام کی بنیادی تعلیمات سے مکمل طور پر لاتعلق ہیں۔

بیان میں کہا گیا کہ یہ گروہ مذہب کی گمراہ کن تشریح کر کے اسے اپنے مقاصد کے لیے استعمال کرتا ہے، جسے خیبر پختونخوا اور پاکستان کے عوام مسترد کرتے ہیں۔ آئی ایس پی آر کے مطابق علاقے میں مزید مشتبہ ٹھکانوں کی نشاندہی اور ان کی کلیئرنس کے لیے سیکیورٹی فورسز کی کارروائی جاری ہے۔

ترجمان نے واضح کیا کہ وفاقی ایپکس کمیٹی سے منظور شدہ نیشنل ایکشن پلان اور وژن عزمِ استحکام کے تحت سیکیورٹی فورسز اور قانون نافذ کرنے والے اداروں کی انسداد دہشت گردی مہم پوری رفتار سے جاری رہے گی، جس کا مقصد ملک سے بیرونی سرپرستی اور معاونت سے ہونے والی دہشت گردی کا خاتمہ ہے۔

ادھر وزیراعظم شہباز شریف نے سیکیورٹی فورسز کی کامیاب انٹیلی جنس بیسڈ کارروائی اور پیشہ ورانہ مہارت کو سراہتے ہوئے کہا کہ دہشت گردوں کی جانب سے مساجد کو دھماکا خیز مواد ذخیرہ کرنے اور تشدد کے مراکز کے طور پر استعمال کرنا اسلام اور مقدس مقامات کی صریح بے حرمتی ہے۔ گورنر خیبر پختونخوا نے بھی فورسز کی کارکردگی کو خراج تحسین پیش کیا۔