کراچی پولیس افسر کے قتل کی تحقیقات اندرون سندھ تک پھیل گئیں، ڈکیت گروہ پر شبہ

کراچی میں اسٹیل ٹاؤن کے علاقے میں پولیس انسپکٹر جاوید ابڑو کے قتل کے معاملے کی تحقیقات کا دائرہ اب اندرون سندھ تک پھیلا دیا گیا ہے۔ تفتیشی حکام کے مطابق اس قتل میں ایک ڈکیت گروہ کے کارندوں کے ملوث ہونے کا شبہ ظاہر کیا جا رہا ہے اور اسی سلسلے میں تحقیقات کو مزید وسعت دی گئی ہے۔

تفتیشی ذرائع کے مطابق مذکورہ ڈکیت گروہ کے کارندے محبوب اور منٹھار جاوید ابڑو کے بھائی کے قتل میں بھی ملوث رہے ہیں۔ اطلاعات کے مطابق ناریجو گینگ سے تعلق رکھنے والا کارندہ فیاض عرف اکبر مقتول بھائی کے ہاتھوں مارا گیا تھا، جس کے بعد پرانے قتل کے معاملے کو بھی موجودہ تفتیش کا حصہ بنا دیا گیا ہے۔

حکام کے مطابق اس گروہ کے بیشتر کارندے سندھ کے مختلف شہروں میں روپوش ہیں اور پولیس ان کے ممکنہ ٹھکانوں کا سراغ لگانے کے لیے کوششیں کر رہی ہے۔ تفتیشی ٹیم نے جائے وقوعہ کی جیو فینسنگ مکمل کر لی ہے، جبکہ حملہ آوروں کے فرار کے ممکنہ راستوں کی جیو میپنگ کا عمل بھی جاری ہے۔

پولیس ذرائع کا کہنا ہے کہ ملزمان تک پہنچنے کے لیے مختلف پہلوؤں سے تحقیقات کی جا رہی ہیں اور اندرون سندھ میں روپوش ڈکیت گروہ کے کارندوں کے ممکنہ کردار کا باریک بینی سے جائزہ لیا جا رہا ہے۔ اس حوالے سے مزید معلومات جمع کرنے کے لیے متعلقہ علاقوں میں کارروائیاں بھی کی جا سکتی ہیں۔

واضح رہے کہ اتوار کے روز سابق ایس ایچ او اور پولیس انسپکٹر جاوید ابڑو کو اسٹیل ٹاؤن میں فائرنگ کر کے شہید کر دیا گیا تھا، جبکہ ان کی اہلیہ زخمی ہوئیں تھیں۔ واقعے کے بعد پولیس نے تفتیش کا آغاز کیا اور اب تک مختلف پہلوؤں پر کام جاری ہے۔

یہ واقعہ شہر میں قانون نافذ کرنے والے اداروں کے اہلکاروں کے خلاف بڑھتے ہوئے حملوں کی جانب بھی اشارہ کرتا ہے۔ تفتیشی حکام کا کہنا ہے کہ کیس کے تمام پہلوؤں کو مدنظر رکھتے ہوئے شواہد اکٹھے کیے جا رہے ہیں تاکہ ملزمان کو انصاف کے کٹہرے میں لایا جا سکے۔