پی آئی اے نے ملازمین کے لیے ڈسکلوزر فارم لازمی کر دیا، 9 نومبر آخری تاریخ

پاکستان انٹرنیشنل ایئرلائنز (پی آئی اے) کی انتظامیہ نے ادارے میں شفافیت کے فروغ اور مفادات کے حقیقی یا ممکنہ ٹکراؤ کی نشاندہی کے لیے تمام ملازمین کو ڈسکلوزر فارم جمع کرانے کی ہدایت کر دی ہے۔ ذرائع کے مطابق یہ ہدایت ادارے کے تمام ملازمین پر لاگو ہوگی اور اس سلسلے میں آخری تاریخ 9 نومبر مقرر کی گئی ہے۔

انتظامیہ کی جانب سے جاری کردہ ہدایات کے مطابق ملازمین کو اپنے والدین، بہن بھائیوں، شریک حیات اور دیگر قریبی رشتے داروں کی تفصیلات فراہم کرنا ہوں گی۔ اس کے علاوہ انہیں ادارے میں کام کرنے والے تھرڈ پارٹی اور آؤٹ سورس ملازمین سے اپنے تعلقات کی تفصیلات بھی ظاہر کرنی ہوں گی۔

ملازمین سے پی آئی اے کے کاروباری شراکت داروں، سپلائرز اور کنٹریکٹرز کے ساتھ روابط کی معلومات بھی طلب کی گئی ہیں، جبکہ انہیں اپنے رشتے داروں کے کاروباری مفادات اور متعلقہ روابط سے بھی انتظامیہ کو آگاہ کرنا ہوگا۔ یہ معلومات درست ریکارڈ برقرار رکھنے اور شفافیت کو یقینی بنانے کے لیے جمع کی جا رہی ہیں۔

پی آئی اے انتظامیہ نے واضح کیا ہے کہ فراہم کردہ معلومات کو خفیہ رکھا جائے گا اور صرف مجاز حکام ہی ان تک رسائی حاصل کر سکیں گے۔ اس اقدام کا مقصد ملازمین کے مفادات کے ممکنہ ٹکراؤ کو بروقت شناسائی کے ذریعے ادارتی فیصلہ سازی میں غیر جانبداری کو یقینی بنانا ہے۔

ادارے نے متنبہ کیا ہے کہ غلط معلومات فراہم کرنے، متعلقہ تعلقات چھپانے یا مقررہ تاریخ تک ڈسکلوزر فارم جمع نہ کرانے والے ملازمین کے خلاف تادیبی کارروائی عمل میں لائی جا سکتی ہے۔ ڈسکلوزر فارم پی آئی اے کے ای آر پی مین پیج پر دستیاب ہے تاکہ ملازمین اسے آسانی سے حاصل کر کے مقررہ وقت پر جمع کرا سکیں۔

یاد رہے کہ قومی ایئرلائن کو گزشتہ برسوں میں متعدد انتظامی و مالی چیلنجز کا سامنا رہا ہے، اور اس طرح کے اقدامات ادارے کی گورننس کو بہتر بنانے اور عوامی اعتماد بحال کرنے کی کوششوں کا حصہ سمجھے جا رہے ہیں۔ ملازمین کے لیے یہ ہدایت ایک بار پھر اس عزم کا اظہار ہے کہ ادارے میں شفافیت اور جوابدہی کو اولین ترجیح دی جائے گی۔