اسلام آباد ایئرپورٹ پر ترکیہ جانے والا مسافر مشکوک ویزے پر آف لوڈ، ایجنٹ سے 11 لاکھ 50 ہزار روپے میں ویزا خریدنے کا انکشاف

ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے ترکیہ جانے والے ایک مسافر کو مشکوک سفری دستاویزات اور ویزے کے مبینہ غلط استعمال کے شبہے میں پرواز سے آف لوڈ کر دیا۔ ایف آئی اے کے مطابق مسافر پرواز نمبر کیو آر 615 کے ذریعے ترکیہ روانہ ہو رہا تھا۔

امیگریشن کلیئرنس کے دوران پروفائلنگ کی بنیاد پر مسافر کی سفری دستاویزات اور سفر کے مقصد میں تضادات سامنے آئے اور وہ ترکیہ جانے کا تسلی بخش جواز بھی پیش نہ کر سکا۔ اسے مزید جانچ پڑتال کے لیے سیکنڈری پروفائلنگ میں بھیجا گیا جہاں سفری دستاویزات اور موبائل فونز کی تفصیلی جانچ کی گئی۔

تحقیقات کے دوران انکشاف ہوا کہ مسافر نے ایک ایجنٹ سے 11 لاکھ 50 ہزار روپے کے عوض این جی او ویزا حاصل کیا تھا۔ ایجنٹ نے مسافر کو یقین دہانی کرائی تھی کہ اس ویزے پر ترکیہ میں ملازمت بھی کی جا سکتی ہے، حالانکہ یہ ویزے کی شرائط کے خلاف ہے۔ مسافر کسی این جی او کا رکن بھی نہیں تھا۔

ایف آئی اے کے مطابق واٹس اپ چیٹس اور موبائل ڈیٹا کے تجزیے سے ایجنٹ کے ساتھ مسافر کے روابط اور ویزے کے مبینہ غلط استعمال کے منصوبے سے متعلق شواہد سامنے آئے۔ تحقیقات میں یہ بھی انکشاف ہوا کہ ایجنٹ نے مسافر کو امیگریشن کلیئرنس حاصل کرنے کے لیے ایف آئی اے افسران کو ڈیڑھ لاکھ روپے رشوت دینے کی ہدایت کی تھی۔

ایف آئی اے نے مسافر کو پرواز سے آف لوڈ کرنے کے بعد مزید قانونی کارروائی اور تفتیش کے لیے اینٹی ہیومن ٹریفکنٹنگ سرکل اسلام آباد کے حوالے کر دیا ہے۔ واضح رہے کہ غیر قانونی طریقے سے ویزا حاصل کرنا اور سرحد پار کرنے کی کوشش انسانی سمگلنگ کے خطرات کو بھی جنم دیتی ہے، جس کے پیش نظر ایئرپورٹس پر سفری دستاویزات کی سخت جانچ کی جاتی ہے۔