پاکستان میں فضائی آلودگی: ملتان اور لاہور میں پی ایم 2.5 کی سطح تشویشناک حد تک بلند

پاکستان کے بڑے شہروں میں فضائی آلودگی کی سطح تشویشناک حد تک بلند رہی ہے، اور دیوالی کی آتش بازی کے بعد صورتحال مزید سنگین ہو گئی ہے۔ پاکستان ایئر کوالٹی انیشی ایٹو (پی اے کیو آئی) کی جانب سے جاری کردہ تازہ رپورٹ کے مطابق 2 سے 8 نومبر 2026 کے دوران ملتان میں پی ایم 2.5 کی اوسط مقدار 241 مائیکروگرام فی مکعب میٹر ریکارڈ کی گئی، جو ملک کے زیرِ جائزہ شہروں میں سب سے زیادہ ہے۔

رپورٹ کے مطابق اسی عرصے میں لاہور میں پی ایم 2.5 کی اوسط مقدار 214 مائیکروگرام فی مکعب میٹر رہی، جو عالمی ادارہ صحت (ڈبلیو ایچ او) کی مقرر کردہ گائیڈ لائن سے 14.3 گنا زیادہ ہے۔ لاہور میں فضائی آلودگی کی سطح انتہائی غیر صحت بخش درجے میں ریکارڈ کی گئی۔

کراچی میں پی ایم 2.5 کی اوسط مقدار 49 مائیکروگرام فی مکعب میٹر رہی جو ڈبلیو ایچ او کی گائیڈ لائن سے 3.3 گنا زیادہ ہے، جبکہ اسلام آباد میں یہ مقدار 65 مائیکروگرام فی مکعب میٹر ریکارڈ کی گئی، جو مقررہ حد سے 4.4 گنا زیادہ ہے۔

رپورٹ میں پیش گوئی کی گئی ہے کہ 11 نومبر تک لاہور میں پی ایم 2.5 کی سطح کم ہو کر 179، کراچی میں بڑھ کر 65، اسلام آباد میں 71 جبکہ ملتان میں کم ہو کر 123 مائیکروگرام فی مکعب میٹر رہنے کا امکان ہے۔

رپورٹ کے مطابق دیوالی کی آتش بازی اور بھارتی پنجاب سے آنے والی آلودہ ہواؤں کے باعث لاہور سمیت پنجاب میں فضائی آلودگی خطرناک حد تک بڑھ گئی ہے۔ پنجاب حکومت نے گزشتہ روز ہی بھارت سے آلودہ ہوائیں لاہور پہنچنے اور سموگ میں اضافے کا خدشہ ظاہر کیا تھا۔

واضح رہے کہ فضائی آلودگی میں اضافہ صحت عامہ کے لیے سنگین خطرہ ہے، خاص طور پر سانس اور دل کے امراض میں مبتلا افراد، بچوں اور بزرگوں کے لیے۔ ماہرین ماسک کے استعمال، گھروں میں رہنے اور باہر کی سرگرمیوں میں احتیاط کی ہدایت کرتے ہیں۔