کراچی کے علاقے تین ہٹی میں پتنگ کی ڈور سے پانچ سالہ بچی جاں بحق

کراچی کے علاقے تین ہٹی میں پتنگ کی دھاتی ڈور ایک بار پھر جان لیوا ثابت ہوئی، جہاں موٹرسائیکل پر سوار پانچ سالہ بچی کے گلے میں ڈور لپٹنے کے باعث وہ شدید زخمی ہو کر جاں بحق ہو گئی۔ ریسکیو حکام کے مطابق یہ واقعہ سید نور علی شاہ کے مزار کے قریب پیش آیا، جہاں بچی اپنے نانا کی گود میں بیٹھی تھی اور اس کے والد موٹرسائیکل چلا رہے تھے۔

ایدھی کے اہلکاروں نے بتایا کہ حادثے کے بعد بچی کی لاش ایمبولینس کے ذریعے جناح اسپتال منتقل کی گئی، جہاں اس کی شناخت پانچ سالہ ثانیہ نور رحمان کے نام سے ہوئی۔ قانونی کارروائی مکمل ہونے کے بعد اہل خانہ بچی کی میت لے کر کورنگی روانہ ہو گئے۔

واقعے کی اطلاع ابتدائی طور پر لیاقت آباد، شریف آباد اور سپر مارکیٹ تھانوں کو دی گئی تھی کہ حادثہ لیاقت آباد نمبر 10 کے پل پر پیش آیا ہے، تاہم بعدازاں تصدیق ہوئی کہ یہ واقعہ دراصل تین ہٹی میں مزار کے قریب پیش آیا تھا۔

جمشید کوارٹر کے ایس ایچ او عمران آفریدی نے رابطے پر واقعے سے لاعلمی کا اظہار کرتے ہوئے کہا کہ اب تک اسپتال کی جانب سے تھانے کو کوئی اطلاع موصول نہیں ہوئی، تاہم پولیس معاملے کی مزید جانچ کر رہی ہے۔

واضح رہے کہ شہر قائد میں پتنگ بازی کے دوران دھاتی اور تیز دھار ڈور کے باعث اس نوعیت کے حادثات وقتاً فوقتاً رونما ہوتے رہتے ہیں، جن میں عام شہری خصوصاً بچے اور موٹرسائیکل سوار متاثر ہوتے ہیں۔ اس واقعے نے پتنگ بازی سے متعلق موجودہ پابندیوں کے مؤثر نفاذ اور عوامی آگاہی کی ضرورت کو ایک بار پھر اجاگر کر دیا ہے۔