کراچی: ڈی ایچ اے میں بکتر بند گاڑیوں کی پریڈ پر کارروائی، دو ملزمان گرفتار

کراچی کے علاقے ڈیفنس میں پولیس اور قانون نافذ کرنے والے اداروں سے مشابہت رکھنے والی بکتر بند گاڑیوں کی پریڈ کی ویڈیو سوشل میڈیا پر وائرل ہونے کے بعد ساؤتھ زون پولیس نے کارروائی کرتے ہوئے اے پی سیز فراہم کرنے والی کمپنی کے منیجر سمیت دو ملزمان کو گرفتار کر لیا ہے۔ ترجمان ساؤتھ زون پولیس کے مطابق واقعے کا مقدمہ ساحل تھانے میں درج کیا گیا ہے۔

پولیس کے مطابق چند ہفتے قبل سوشل میڈیا پر ایک ویڈیو گردش کر رہی تھی جس میں ڈیفنس کے علاقے میں بکتر بند گاڑیوں کی پریڈ دکھائی گئی تھی۔ اس ویڈیو کے باعث شہریوں میں سنسنی پیدا ہوئی اور خوف و ہراس اور عدم تحفظ کا تاثر ابھرا، جس کے بعد قانونی کارروائی کا آغاز کیا گیا۔

مقدمے میں 4×4 Extreme کے مالک اور ایس اینڈ ٹیک آرمڈ کے منیجر سمیت چھ افراد کو نامزد کیا گیا ہے، جبکہ تعزیرات پاکستان کی دفعات 420، 170، 171، 268 اور 290 شامل کی گئی ہیں۔ پولیس نے کارروائی کے دوران ایک لینڈ کروزر گاڑی بھی قبضے میں لی اور واقعے سے متعلق ویڈیو شواہد محفوظ کر لیے ہیں۔

ترجمان کے مطابق دیگر نامزد ملزمان اور گاڑیوں کے مالکان کی گرفتاری کے لیے قانونی کارروائی جاری ہے۔ پولیس کا کہنا ہے کہ وہ اسلحے کی نمائش اور وی آئی پی ڈالہ کلچر کے سخت خلاف ہے اور شہریوں سے اپیل کی گئی ہے کہ وہ قانون کی پاسداری کریں اور ایسی غیر قانونی سرگرمیوں سے گریز کریں۔

واضح رہے کہ شہری علاقوں میں مسلح یا قانون نافذ کرنے والے اداروں سے مشابہ گاڑیوں کی نمائش عوام میں بے چینی پیدا کرنے کا سبب بن سکتی ہے، اسی لیے متعلقہ حکام ایسی سرگرمیوں کو قانون کے دائرے میں رہتے ہوئے سختی سے روکتے ہیں۔