سعودی پاکستان پرائیویٹ ایکویٹی فنڈ کے قیام پر مفاہمتی یادداشت پر دستخط

سعودی پاکستان جوائنٹ بزنس کونسل نے کراچی میں منعقدہ ایک تقریب کے دوران سعودی پاکستان پرائیویٹ ایکویٹی فنڈ کے قیام کے لیے مفاہمتی یادداشت پر دستخط کر دیے ہیں۔ اس موقع پر شہزادہ منصور بن محمد آل سعود نے خطاب کرتے ہوئے کہا کہ سعودی عرب اور پاکستان کے درمیان دوستی اور برادرانہ رشتے کسی بھی معاہدے سے کہیں زیادہ گہرے ہیں، اور یہ نیا فنڈ ان رشتوں کو مضبوط تجارتی بنیاد فراہم کرے گا۔ ان کا کہنا تھا کہ پاکستان مملکتِ سعودی عرب کا فطری شراکت دار ہے اور سعودی سرمایہ کار ایسی منڈیوں کی تلاش میں ہیں جہاں وہ اعتماد کے ساتھ ترقی کر سکیں۔

شہزادہ منصور نے مزید کہا کہ پاکستان کا بغور جائزہ لینے کے بعد انہیں ایک زیادہ مستحکم معیشت اور حقیقی مواقع نظر آ رہے ہیں۔ ان کے مطابق دونوں ممالک میں سرمایہ کاری کر کے برسوں کے غور و فکر کو عملی سرمایہ کاری میں بدلا جا رہا ہے، جس سے دونوں ملکوں کے عوام مستفید ہوں گے اور ایک دیرپا شراکت داری کی بنیاد رکھی جائے گی۔

عارف حبیب گروپ کے سربراہ عارف حبیب نے اس موقع پر کہا کہ یہ فنڈ پاکستان میں منافع بخش سرمایہ کاری کے مواقع پر اعتماد کا اظہار ہے۔ ان کا کہنا تھا کہ طویل عرصے سے پاکستان کے بارے میں پائے جانے والے تاثرات نے حقیقت کو دھندلا رکھا تھا، جبکہ یہ معاہدہ ظاہر کرتا ہے کہ سنجیدہ سرمایہ کار عملی قدم اٹھانے کو تیار ہیں۔ انہوں نے امید ظاہر کی کہ سرمائے کا رخ حکومت کے لینڈ بینک کی منیٹائزیشن کی جانب موڑنے سے غیر فعال اثاثے پیداوری سرمایہ کاری میں تبدیل ہوں گے۔

مفاہمتی یادداشت کے تحت سیکڑوں ملین مالیت کے مشترکہ مجوزہ فنڈ کا قیام عمل میں لایا گیا ہے، جس کے مستقبل کے حجم کو ہر شعبے میں دستیاب مواقع کی بنیاد پر وسیع البنیاد کیا جائے گا۔ اس شراکت داری کے تحت سعودی اور پاکستانی نجی سرمایہ کار فنڈ میں مساوی حصہ ڈالیں گے، جبکہ فنڈ کا 75 فیصد حصہ پاکستان اور 25 فیصد حصہ سعودی عرب کے منصوبوں میں لگایا جائے گا۔

فنڈ کا مقصد تیزی سے ترقی کرنے والے نجی کاروباروں میں سرمایہ کاری کرنا ہے، جن میں زراعت، کان کنی، تعمیرات اور دیگر صنعتیں شامل ہیں۔ اس کے علاوہ فنڈ حکومتِ پاکستان کے لینڈ بینک کو منیٹائز کرنے کے پروگرام سے سامنے آنے والے تجارتی منصوبوں کا بھی جائزہ لے گا، جن میں ہوائی اڈے، موٹرویز، بندرگاہیں اور بحری شعبے کی ترقی شامل ہیں۔ اس اقدام سے شفاف سرمایہ کاری کے ذریعے کم استعمال ہونے والی سرکاری اراضی کی معاشی قدر کو بروئے کار لانے میں مدد ملے گی، جبکہ فنڈ مقدس شہروں سمیت سعودی عرب بھر میں بھی تجارتی سرمایہ کاری کے مواقع تلاش کرے گا۔

تقریب میں دونوں ممالک سے کونسل کے اراکین نے شرکت کی۔ پاکستان کی جانب سے کونسل کے شریک چیئرمین اور فاطمہ گروپ کے چیئرمین فواد مختار نے ورچوئل طور پر شرکت کی، جبکہ اس موقع پر شہزادہ منصور اور دونوں جانب کے شراکت داروں کی کاوشوں کو بھی سراہا گیا۔