بھارتی فوج میں آر ایس ایس کی سیاسی مداخلت کے اثرات بڑھنے کا انکشاف

بھارتی فوج میں سیاسی اثر و رسوخ کے بڑھتے ہوئے واقعات سامنے آ رہے ہیں، جنہیں ملکی ذرائع ابلاغ میں تشویش کی نگاہ سے دیکھا جا رہا ہے۔ بھارتی جریدے دی وائر کی ایک رپورٹ کے مطابق فوج کو 'انڈینائزیشن' کے نام پر ہندوتوا نظریے سے ہم آہنگ بنانے اور نظریاتی طور پر اسے ایک مخصوص سیاسی فلسفے کا پابند بنانے کی کوششیں کی جا رہی ہیں، جس سے فوج کے روایتی غیر سیاسی کردار پر سوالات اٹھ رہے ہیں۔

رپورٹ کے مطابق ایک تقریب میں بھارتی آرمی چیف اور دیگر سینئر جرنیلوں کی جانب سے ملکی وزیر دفاع کے ساتھ ملاقات کے دوران پیشہ ورانہ آداب کی پاسداری میں کوتاہی دیکھی گئی۔ بتایا گیا ہے کہ قطار میں کھڑے جرنیلوں نے سیکیورٹی کمانڈوز کو نظر انداز کیا اور انہیں سلامی تک پیش نہیں کی، جبکہ فوٹو سیشن کے دوران بار بار اٹھنے بیٹھنے کے عمل نے عسکری تربیت اور پیشہ ورانہ ماحول کے فقدان کو نمایاں کیا۔

واقعے کی ویڈیو بھارتی نیوز ایجنسی اے این آئی کی جانب سے جاری کی گئی، جس میں فوجی سلسلہ مراتب کی خلاف ورزی واضح طور پر دیکھی جا سکتی ہے۔ مبصرین کے مطابق اس طرح کے مناظر ایک ایسے ملک میں فوجی روایات کے لیے غیر معمولی ہیں جہاں مسلح افواج کی شبیہ طویل عرصے سے پیشہ ورانہ اور غیر جانبدار تصور کی جاتی رہی ہے، اور یہ صورتحال سیاسی رہنماؤں کی جانب سے فوجی ادارے پر اثر انداز ہونے کی کوششوں کی عکاسی کرتی ہے۔

رپورٹ میں یہ بھی بتایا گیا کہ بی جے پی اور آر ایس ایس سے وابستہ سیاست دانوں کی جانب سے فوج کے اعلیٰ افسران کے بنیادی فوجی پروٹوکول کی خلاف ورزی کے واقعات میں اضافہ ہوا ہے۔ تجزیہ کاروں کا خیال ہے کہ فوجی ادارے میں نظریاتی مداخلت نہ صرف اندرونی نظم و ضبط کو کمزور کرتی ہے بلکہ ایک جمہوری ملک میں شہری حکومت اور فوجی ادارے کے درمیان توازن کو بھی متاثر کر سکتی ہے۔

بھارتی میڈیا میں یہ بحث بھی جاری ہے کہ فوج کے اندر سیاسی نظریے کی ترویج سے درجہ بندی اور قابلیت کے اصول متاثر ہو سکتے ہیں، جو طویل مدت میں ادارہ جاتی کارکردگی پر اثر ڈال سکتے ہیں۔ دوسری جانب بھارتی حکام کی جانب سے ان الزامات پر کوئی واضح وضاحت سامنے نہیں آئی، تاہم رپورٹ نے فوجی روایات اور سیاسی غیر جانبداری کے حوالے سے اہم سوالات کھڑے کر دیے ہیں۔