لاہور میں 13 سالہ بچی کی شادی کی تقریب روک دی گئی، دولہا سمیت 6 افراد گرفتار

لاہور کے علاقے لیاقت آباد میں پولیس نے ایک 13 سالہ بچی کی شادی کی تقریب وقت پر روک کر دولہا اور بچی کے والد سمیت چھ افراد کو گرفتار کر لیا ہے۔ پولیس کے مطابق یہ کارروائی 15 تاریخ کو موصول ہونے والی اطلاع کی بنیاد پر کی گئی، جس کے بعد مدینہ شادی ہال کشمیری محلہ میں فوری چھاپہ مارا گیا۔

پولیس حکام کے مطابق چھاپے کے وقت ہال میں بچی کی رخصتی کی تقریب جاری تھی۔ کارروائی کے دوران دولہا سبط الحسن اور بچی کے والد سبطین کو حراست میں لیا گیا، جبکہ تقریب میں موجود چار دیگر افراد کو بھی گرفتار کر لیا گیا۔

ابتدائی تحقیقات سے معلوم ہوا ہے کہ بچی کا نکاح 4 اکتوبر کو پڑھایا گیا تھا، جبکہ 8 نومبر کو رخصتی کی تقریب منعقد کی جا رہی تھی۔ پولیس نے تھانہ لیاقت آباد میں مقدمہ درج کر کے مزید تفتیش شروع کر دی ہے تاکہ واقعے میں ملوث دیگر افراد کا بھی پتہ لگایا جا سکے۔

ڈی آئی جی آپریشنز فیصل کامران نے اس موقع پر کہا کہ کم عمری کی شادی قانوناً جرم ہے اور بچوں کے تحفظ کے معاملے پر کسی قسم کی رعایت نہیں دی جائے گی۔ انہوں نے واضح کیا کہ کم عمر بچوں کی شادی میں ملوث افراد کے خلاف بلاامتیاز قانونی کارروائی کو یقینی بنایا جائے گا۔

ان کا مزید کہنا تھا کہ بچوں کے حقوق کا تحفظ لاہور پولیس کی اولین ترجیح ہے اور اس مقصد کے لیے متعلقہ محکموں کے ساتھ مل کر آگاہی اور قانونی اقدامات جاری رکھے جائیں گے۔

یاد رہے کہ پاکستان میں کم عمری کی شادی کے خلاف قوانین موجود ہیں اور صوبائی سطح پر بچوں کے تحفظ کے لیے الگ ادارے فعال ہیں۔ ماہرین کے مطابق بچوں کی شادی نہ صرف قانون کی خلاف ورزی ہے بلکہ اس کے صحت، تعلیم اور سماجی زندگی پر منفی اثرات مرتب ہوتے ہیں، اس لیے ایسے واقعات کی بروقت اطلاع اور قانونی کارروائی انتہائی اہم ہے۔