کراچی: کم عمر بچی کو ہراساں کرنے والے ملزم کو 14 سال قید اور 10 لاکھ روپے جرمانے کی سزا

کراچی کی ایک عدالت نے لیاقت آباد میں کم عمر بچی کو جنسی ہراساں کرنے کے مقدمے کا فیصلہ سناتے ہوئے ملزم یاسر کو 14 برس قید اور 10 لاکھ روپے جرمانے کی سزا سنادی ہے۔ ایڈیشنل ڈسٹرکٹ اینڈ سیشن جج وسطی کی عدالت نے یہ فیصلہ جرم ثابت ہونے پر سنایا۔

عدالت نے فیصلے میں واضح کیا کہ متاثرہ نابالغ بچی کی رضامندی کو قانون میں کوئی حیثیت حاصل نہیں۔ کم عمر لڑکی کا مرضی سے ملزم کے ساتھ جانا اجازت شمار نہیں کیا جاسکتا۔ عدالت نے مزید کہا کہ متاثرہ لڑکی کی جانب سے دوران ٹرائل ملزم کو معاف کیا گیا تھا، تاہم جنسی استحصال جیسے ناقابل رضامندی جرم میں معافی ملزم کی بریت کی بنیاد نہیں بن سکتی۔

فیصلے میں تفتیشی افسر کی جانب سے متاثرہ لڑکی کا طبی معائنہ یا جائے وقوعہ کا معائنہ نہ کرنے کو تفتیشی خامی قرار دیا گیا، لیکن عدالت نے کہا کہ محض تفتیشی خامی کی بنیاد پر ملزم کو بری نہیں کیا جاسکتا۔ عدالت کے مطابق متاثرہ لڑکی کی قابل اعتماد گواہی جنسی استحصال کے جرم کو ثابت کرنے کے لیے کافی ہے۔

پولیس کے مطابق ملزم کے خلاف مقدمہ 2023 میں لیاقت آباد تھانے میں درج کیا گیا تھا۔ عدالت نے تمام شواہد اور گواہیوں کا جائزہ لینے کے بعد ملزم کو قرار واقعی سزا سنائی۔

یہ فیصلہ ایسے وقت میں سامنے آیا ہے جب ملک میں خواتین اور بچوں کے خلاف جرائم کے حوالے سے قانونی کارروائی پر زور دیا جا رہا ہے۔ ماہرین قانون کا کہنا ہے کہ نابالغوں کے تحفظ کے لیے سخت قوانین اور موثر تفتیش ضروری ہے تاکہ مجرموں کو قرار واقعی سزا مل سکے۔