ریاض میں پاکستانی سفیر کی پینٹنگز کی نمائش، سعودی شہزادے اور راحیل شریف کی شرکت

سعودی عرب کے دارالحکومت ریاض میں پاکستانی سفیر احمد فاروق کی تخلیق کردہ پینٹنگز کی ایک نمائش منعقد ہوئی جس میں سعودی شاہی خاندان کے رکن شہزادہ سلطان بن سلمان آل سعود اور اسلامی عسکری اتحاد کے کمانڈر جنرل (ر) راحیل شریف نے شرکت کی۔ یہ نمائش ڈپلومیٹک کوارٹر میں منعقد ہوئی جہاں مختلف ممالک کے سفیروں اور دیگر معززین نے بھی شرکت کی۔

نمائش میں پیش کیے گئے فن پاروں میں سعودی عرب کے تاریخی علاقے الدرعیہ، قدیم عرب معاشرت، روایات اور ثقافت کو فنکارانہ انداز میں پیش کیا گیا۔ شرکا نے پاکستانی سفیر کی فنی کاوشوں کو سراہتے ہوئے کہا کہ یہ پینٹنگز سعودی ثقافتی ورثے کی خوبصورت عکاسی کرتی ہیں۔

اس موقع پر پاکستانی سفیر احمد فاروق نے گفتگو کرتے ہوئے کہا کہ سعودی عرب قدیم عرب روایات اور تاریخی ورثے کا امین ہے۔ انہوں نے بتایا کہ گزشتہ تین سال سے وہ تاریخی علاقے الدرعیہ کو اپنی پینٹنگز کا موضوع بنا رہے ہیں تاکہ فن کے ذریعے پاکستان اور سعودی عرب کے قریبی تعلقات اور مشترکہ ثقافتی اقدار کو اجاگر کیا جا سکے۔

شہزادہ سلطان بن سلمان آل سعود نے پاکستانی سفیر کی فنی کاوشوں کو سراہتے ہوئے کہا کہ ان پینٹنگز میں سعودی ثقافت اور روایات کی خوبصورت عکاسی قابل تحسین ہے۔ ان کا کہنا تھا کہ سعودی عرب اپنی ثقافت کے حوالے سے دنیا بھر میں منفرد شناخت رکھتا ہے جبکہ پاکستان بھی ایک خوبصورت ملک اور بے پناہ صلاحیتوں کی حامل قوم ہے۔

واضح رہے کہ یہ نمائش پاکستان اور سعودی عرب کے درمیان ثقافتی اور عوامی سطح پر تعلقات کو مزید مضبوط بنانے کی ایک کڑی ہے۔ اس طرح کے ثقافتی تبادلے دونوں ممالک کے عوام کے درمیان باہمی افہام و تفہیم کو فروغ دینے میں اہم کردار ادا کرتے ہیں۔