سندھ طاس معاہدے پر سماعت، پاکستان کے انڈس واٹر کمشنر ویانا پہنچ گئے

سندھ طاس معاہدے پر عمل درآمد سے متعلق تنازعے کی سماعت کے سلسلے میں پاکستان کے انڈس واٹر کمشنر سید محمد مہر علی شاہ ویانا پہنچ گئے ہیں۔ ذرائع کے مطابق آسٹریا کے شہر ویانا میں نیوٹرل ایکسپرٹ کے پاس ہونے والی اس سماعت کا مقصد بھارت کے ہائیڈرو پاور منصوبوں کے ڈیزائن پر پاکستان کے خدشات کا جائزہ لینا ہے۔

وفاقی وزیر آبی وسائل میاں محمد معین وٹو نے ایک ٹی وی چینل سے گفتگو کرتے ہوئے کہا کہ انڈس واٹر کمیشن کے معاملے پر بھارت کی جانب سے ہٹ دھرمی کا مظاہرہ کیا جا رہا ہے۔ ان کا کہنا تھا کہ پاکستان پہلے ہی نیدرلینڈز میں قائم مصالحتی عدالت میں یہ کیس جیت چکا ہے اور اب اس کی آئندہ سماعت ویانا میں نیوٹرل ایکسپرٹ کے پاس ہوگی۔

وزیر آبی وسائل نے مزید کہا کہ بھارت کو واضح پیغام ہے کہ وہ پاکستان کا موقف تسلیم کرے، ورنہ آئندہ دنوں میں مشکلات کا سامنا کرنا پڑ سکتا ہے۔ انہوں نے بتایا کہ معاہدے پر عمل درآمد سے متعلق معاملہ اقوام متحدہ میں بھی دوبارہ اٹھایا جائے گا اور سندھ طاس معاہدے پر عمل درآمد ہر صورت یقینی بنایا جائے گا۔

ادھر وزیر اطلاعات عطا تارڑ نے کہا ہے کہ سندھ طاس معاہدہ 24 کروڑ پاکستانیوں کی شہ رگ کی حیثیت رکھتا ہے اور پانی کے تحفظ کے لیے ہر ممکن اقدام کیا جائے گا۔ ان کے مطابق سردیوں کے آغاز کی وجہ سے پانی کی قلت موجود ہے، تاہم بھارت نے اب تک پانی نہیں روکا۔

پاکستان کو بھارت کے کشن گنگا اور رتلے ہائیڈرو پاور منصوبوں کے ڈیزائن پر تشویش ہے کہ ان منصوبوں میں پانی ذخیرہ کرنے اور چھوڑنے کا نظام دریائے چناب سمیت دیگر مغربی دریاؤں کے بہاؤ پر اثر انداز ہو سکتا ہے۔ ماہرین کے مطابق یہی خدشہ اس وقت ویانا میں ہونے والی سماعت کا مرکزی نقطہ ہے۔

واضح رہے کہ سندھ طاس معاہدہ پاکستان اور بھارت کے درمیان 1960 میں عالمی بینک کی وساطت سے طے ہوا تھا، جس کے تحت مشرقی اور مغربی دریاؤں کے پانی کے حقوق کا تعین کیا گیا۔ پاکستان کا مؤقف ہے کہ بھارت کی جانب سے تعمیر کیے جانے والے منصوبے معاہدے کی روح کے مطابق نہیں اور ان سے پاکستان کے پانی کے حصے پر منفی اثرات مرتب ہو سکتے ہیں۔