ایران کی جنوبی پارس گیس فیلڈ میں آگ بھڑک اٹھی، حکام نے قابو پالیا

ایران کی جنوبی پارس گیس فیلڈ کے ایک پلیٹ فارم پر منگل کے روز آگ بھڑک اٹھی جس پر حکام نے قابو پالیا ہے۔ ایرانی خبر رساں ادارے فارس کے مطابق نائب وزیر پیٹرولیم نے بتایا کہ آگ بجھا دی گئی ہے اور واقعے کی وجوہات جاننے کے لیے تحقیقات شروع کر دی گئی ہیں۔

ابتدائی طور پر گیس لیکیج یا آپریشن کے دوران پیش آنے والے کسی حادثے کو آتشزدگی کی ممکنہ وجوہات قرار دیا جا رہا ہے۔ متاثرہ پلیٹ فارم سے روزانہ تقریباً 1 کروڑ 45 لاکھ مکعب میٹر گیس پیدا ہوتی ہے جبکہ جنوبی پارس گیس فیلڈ کی مجموعی یومیہ پیداوار 70 کروڑ مکعب میٹر بتائی جاتی ہے۔

جنوبی پارس دنیا کا سب سے بڑا آف شور قدرتی گیس ذخیرہ ہے جسے ایران قطر کے ساتھ مشترکہ طور پر استعمال کرتا ہے۔ قطر میں اس ذخیرے کو نارتھ ڈوم کہا جاتا ہے۔ گیس ایکسپورٹنگ کنٹریز فورم کے اعداد و شمار کے مطابق ایران نے 2024 میں مجموعی طور پر 276 ارب مکعب میٹر گیس پیدا کی جس کا 94 فیصد ملک کے اندر استعمال ہوا۔

رپورٹ کے مطابق اس مشترکہ گیس ذخیرے میں تقریباً 1800 ٹریلین مکعب فٹ قابلِ استعمال گیس موجود ہے جو دنیا کی 13 سالہ ضروریات پوری کرنے کے لیے کافی ہے۔

واضح رہے کہ یہ واقعہ ایران کی توانائی کی صنعت کے لیے اہم ہے کیونکہ ملک کی گیس کی طلب کا بڑا حصہ اسی فیلڈ سے پورا ہوتا ہے۔ حکام کا کہنا ہے کہ صورتحال معمول پر آ گئی ہے اور پیداوار پر کوئی اثر نہیں پڑا۔