سینیٹ کمیٹی کا انکشاف: صوبائی اختیار کی وزارتوں پر 5 ہزار ارب روپے سے زائد خرچ

سینیٹ کی فنکشنل کمیٹی برائے ڈیولوشن کی ذیلی کمیٹی نے انکشاف کیا ہے کہ وفاقی حکومت نے 18ویں آئینی ترمیم کے بعد گزشتہ 16 برسوں کے دوران صوبائی دائرہ اختیار میں آنے والے محکموں اور وزارتوں پر 5 ہزار ارب روپے سے زائد خرچ کیے۔ کمیٹی نے اسے آئین کے منافی قرار دیتے ہوئے متعلقہ وزارتوں کے لیے مزید فنڈز جاری نہ کرنے کی ہدایت کی ہے۔

اجلاس میں کمیٹی نے وزیراعظم آفس کو ان وزارتوں کے خاتمے کے لیے حتمی مہلت دیتے ہوئے خبردار کیا کہ احکامات پر عمل درآمد نہ ہونے کی صورت میں وزیراعظم آفس کو نوٹس بھیجا جا سکتا ہے۔ آڈیٹر جنرل آف پاکستان کے دفتر نے 2011 سے 2026 تک صوبائی دائرہ اختیار میں کام کرنے والی وفاقی وزارتوں کے اخراجات کی تفصیلات پیش کیں۔

کمیٹی کے چیئرمین سینیٹر ضمیر حسین گھمرو نے کہا کہ ان وزارتوں پر 5 ہزار ارب روپے سے زائد، یعنی تقریباً 18 ارب ڈالر خرچ کیے گئے، جو اسی عرصے میں عالمی مالیاتی فنڈ سے حاصل کیے گئے 15 ارب ڈالر کے قرض سے بھی زیادہ ہیں۔ ان کا کہنا تھا کہ اگر وفاقی حکومت آئین کی پاسداری کرتے ہوئے صوبوں کو منتقل کیے گئے شعبوں میں اخراجات نہ کرتی تو ملک کو آئی ایم ایف کے پروگراموں سے بچایا جا سکتا تھا۔

آڈیٹر جنرل کے اعداد و شمار کے مطابق گزشتہ 16 برسوں میں وزارت تعلیم پر ایک ہزار 100 ارب، وزارت آبی وسائل پر 935 ارب، وزارت ریلوے پر 687 ارب، وزارت صحت پر 651 ارب، وزارت ہاؤسنگ پر 398.4 ارب، وزارت صنعت و پیداوار پر 313 ارب، وزارت قومی غذائی تحفظ پر 270 ارب، وزارت منصوبہ بندی پر 185 ارب، وزارت بین الصوبائی رابطہ پر 51.7 ارب، وزارت موسمیاتی تبدیلی پر 48.8 ارب، وزارت انسداد منشیات پر 35 ارب اور وزارت پٹرولیم پر 32 ارب روپے خرچ کیے گئے۔

کمیٹی نے وزارت خزانہ، آڈیٹر جنرل پاکستان اور اکاؤنٹنٹ جنرل پاکستان ریونیو کو ہدایت کی کہ آئین کے تحت صوبوں کو منتقل کیے گئے شعبوں سے متعلق وفاقی وزارتوں کے لیے مزید فنڈز جاری نہ کیے جائیں۔ سینیٹر گھمرو نے کہا کہ کمیٹی فی الحال معاملہ اختیارات کے ناجائز استعمال کے تحت قومی احتساب بیورو کو بھیجنے سے گریز کر رہی ہے، تاہم صوبوں کو منتقل کیے گئے شعبوں کے لیے بجٹ مختص کرنا قابل گرفت عمل ہو سکتا ہے۔

انہوں نے مزید کہا کہ بین الاقوامی معاہدوں اور ذمہ داریوں کو جواز بنا کر وفاقی وزارتیں برقرار رکھنے کی آئین میں کوئی گنجائش نہیں، کیونکہ آئین کا آرٹیکل 173 صوبائی حکومتوں کو بھی بین الاقوامی معاہدے کرنے کا اختیار دیتا ہے۔ کمیٹی اس سے قبل حکومت کو وزارت صحت، تعلیم، غذائی تحفظ، آبی وسائل، موسمیاتی تبدیلی، ہاؤسنگ، ثقافت و ورثہ، ریلوے، صنعت، شماریات، پٹرولیم، بین الصوبائی رابطہ اور انسداد منشیات سمیت 17 وزارتیں ختم کرنے کے لیے دو ہفتوں کی مہلت دے چکی ہے۔