سکھر میں حساس اداروں کی کارروائی، لاکھوں روپے کا آتش بازی کا سامان برآمد، 3 افراد گرفتار

سکھر میں حساس اداروں اور پولیس نے مشترکہ کارروائی کرتے ہوئے لاکھوں روپے مالیت کا آتش بازی کا سامان برآمد کرکے تین افراد کو حراست میں لے لیا ہے۔ یہ کارروائی سی سیکشن تھانے کی حدود میں واقع پرانا سکھر کے علاقے میں خفیہ اطلاع کی بنیاد پر کی گئی۔

پولیس کے مطابق کارروائی کے دوران بھاری مقدار میں آتش بازی کا سامان تحویل میں لیا گیا، جس کی مالیت لاکھوں روپے بتائی جاتی ہے۔ واقعے کی مزید تحقیقات اور قانونی کارروائی جاری ہے، جبکہ حراست میں لیے گئے افراد سے پوچھ گچھ کی جا رہی ہے۔

واضح رہے کہ گزشتہ روز سکھر کے سٹی بائی پاس پر واقع پاکستان کلب کے شادی ہال میں دیوالی کی تقریب کے دوران آتش بازی سے آگ لگ گئی تھی، جس کے نتیجے میں فرنیچر اور سجاوٹ سمیت قیمتی سامان جل کر خاکستر ہو گیا تھا اور دو افراد زخمی ہوئے تھے۔

ذرائع کے مطابق حالیہ کارروائی کو پاکستان کلب میں آتشزدگی کے واقعے کے بعد آتش بازی کے سامان کے خلاف شروع کیے گئے اقدامات کا حصہ قرار دیا جا رہا ہے۔ متعلقہ حکام نے آتش بازی کے غیر قانونی استعمال اور ذخیرہ اندوزی کے خلاف کارروائیوں میں تیزی لانے کا عزم ظاہر کیا ہے۔

یاد رہے کہ آتش بازی کے سامان کی غیر قانونی فروخت اور ذخیرہ اندوزی قیمتی جان و مال کے لیے خطرہ ہے، اور اس سے قبل بھی مختلف واقعات میں جانی و مالی نقصان رپورٹ ہوا ہے۔ عوام سے بھی گزارش کی جاتی ہے کہ وہ محفوظ طریقوں سے تقریبات منعقد کریں اور آتش بازی کے استعمال سے گریز کریں۔