لیاری گینگ وار کے ارشد پپو کا بھتیجا گرفتار، 2022 میں پولیس انسپکٹر کے قتل کا ملزم

کراچی کے علاقے کلاکوٹ میں پولیس نے کارروائی کرتے ہوئے لیاری گینگ وار کے مقتول سرغنہ ارشد پپو کے بھتیجے اذان اور اس کے ساتھی یحییٰ کو گرفتار کرلیا ہے۔ پولیس کے مطابق گرفتار ملزمان کے قبضے سے ہینڈ گرنیڈ اور پستول بھی برآمد ہوئے ہیں۔

پولیس حکام کے مطابق دونوں ملزمان ٹارگٹ کلنگ، اغوا برائے تاوان، بھتہ خوری اور دیگر سنگین جرائم کی وارداتوں میں ملوث رہے ہیں۔ ان کے خلاف گلشن اقبال، بلال کالونی، خواجہ اجمیر نگری اور پریڈی تھانوں میں قتل، دہشت گردی اور ڈکیتی سمیت متعدد مقدمات درج ہیں۔

پولیس نے بتایا کہ گرفتار ملزم اذان 22 مارچ 2022 کو پولیس انسپکٹر چاند خان نیازی اور عبدالرحمان کے سرعام قتل میں ملوث تھا۔ اس واردات میں ارشد پپو کا بیٹا عالم بھی شامل تھا جو موٹرسائیکل چلا رہا تھا جبکہ اذان اس کے پیچھے بیٹھا تھا۔ واقعے کی سی سی ٹی وی فوٹیج بھی منظر عام پر آئی تھی۔

پولیس کے مطابق عالم کو واردات کے چند گھنٹوں بعد سندھ رینجرز نے گرفتار کرلیا تھا، جبکہ اذان پڑوسی ملک ایران فرار ہوگیا تھا۔ اب اسے اس کے ساتھی سمیت گرفتار کرلیا گیا ہے۔ دونوں ملزمان 2022 میں انسپکٹر چاند خان نیازی کے قتل کے مقدمے میں مفرور اور اشتہاری تھے۔

مزید برآں، پولیس کا کہنا ہے کہ گرفتار ملزمان لیاری گینگ وار کے سرغنہ عزیر بلوچ کے بھائی زبیر سٹے کے قتل کے مقدمے میں بھی ملوث ہیں۔ گرفتار ملزمان سے مزید تفتیش جاری ہے جس دوران ان کے دیگر ساتھیوں اور گینگ وار کے نیٹ ورک سے متعلق معلومات حاصل کی جارہی ہیں۔