پاکستان میں ذیابیطس کے خلاف 6 ارب 80 کروڑ روپے کا قومی پروگرام تیار

پاکستان میں ذیابیطس کے بڑھتے ہوئے مسئلے سے نمٹنے کے لیے حکومت نے 6 ارب 80 کروڑ روپے کا ایک جامع قومی پروگرام تیار کر لیا ہے۔ اس پروگرام کا مقصد ملک بھر میں عوام کی اسکریننگ، بیماری سے متعلق آگاہی، ابتدائی تشخیص اور علاج کی سہولیات کو ایک مربوط نظام کے تحت لانا ہے۔

منصوبے کے مطابق پروگرام کا آغاز اسلام آباد سے ایک ماڈل منصوبے کے طور پر کیا جائے گا اور بعد ازاں اسے دیگر صوبوں تک بھی بڑھایا جائے گا۔ اس پروگرام میں پاکستانی عوام میں ذیابیطس کے خطرے کا فوری جائزہ لینے کے لیے RAPID اسکور بھی استعمال کیا جائے گا، جس کے ذریعے صرف تین بنیادی سوالات کی مدد سے تقریباً 30 سیکنڈ میں کسی شخص میں اس مرض کے خطرے کا ابتدائی اندازہ لگایا جا سکے گا۔

انڈس ذیابیطس اینڈ اینڈوکرائن سینٹر کے ڈائریکٹر ڈاکٹر عبدالباسط نے بتایا کہ پاکستان میں ذیابیطس کے مریضوں کی تعداد مسلسل بڑھ رہی ہے اور اب یہ بیماری صرف بڑی عمر کے افراد تک محدود نہیں رہی، بلکہ بچوں میں بھی ذیابیطس کے کیسز سامنے آ رہے ہیں۔ ان کا کہنا تھا کہ ملک میں اس بڑھتے ہوئے مسئلے سے نمٹنے کے لیے کئی سال سے قومی سطح پر اقدامات کی ضرورت پر زور دیا جا رہا تھا، جس کے نتیجے میں وزیراعظم کے پروگرام برائے انسداد و کنٹرول ذیابیطس کے تحت ایک جامع حکمت عملی مرتب کی گئی ہے۔

پروگرام کی باقاعدہ تاریخوں اور عملی آغاز سے متعلق تفصیلات جلد سامنے آنے کی توقع ہے۔ ڈاکٹر عبدالباسط کے مطابق ذیابیطس کے خطرے کی ابتدائی شناخت کے لیے RAPID اسکور استعمال کیا جائے گا، جس میں کسی خون کے ٹیسٹ یا پیچیدہ طبی معائنے کی ضرورت نہیں ہوگی۔ اس طریقے میں عمر، پیٹ کی گولائی اور خاندان میں ذیابیطس کی موجودگی سے متعلق تین سوالات پوچھے جاتے ہیں، اور ان کے جوابات کی بنیاد پر ایک مجموعی اسکور مرتب کیا جاتا ہے۔

اس اسکور کی مدد سے یہ معلوم کیا جا سکتا ہے کہ کسی شخص کو ذیابیطس لاحق ہونے کا خطرہ کتنا ہے اور اسے مزید طبی ٹیسٹ کروانے کی ضرورت ہے یا نہیں۔ RAPID اسکور کے مطابق پہلا سوال عمر سے متعلق ہے، جس میں 40 سال سے کم عمر افراد کو صفر نمبر، 40 سے 60 سال کی عمر کے افراد کو ایک نمبر اور 60 سال سے زائد عمر والوں کو تین نمبر دیے جاتے ہیں۔ اس پروگرام کو ملک میں ذیابیطس کی روک تھام اور بروقت تشخیص کے لیے ایک اہم قدم قرار دیا جا رہا ہے۔