پمز انکوائری رپورٹ پر وفاقی وزیر صحت اور ڈاکٹر شازیہ سومرو میں تلخ کلامی

اسلام آباد میں قومی اسمبلی کی قائمہ کمیٹی برائے صحت کا اجلاس ڈاکٹر مہیش کمار کی صدارت میں منعقد ہوا، جس میں پمز اسپتال کی انکوائری رپورٹ پر وفاقی وزیر صحت مصطفیٰ کمال اور کمیٹی رکن ڈاکٹر شازیہ سومرو کے درمیان سخت نوک جھونک دیکھنے کو ملی۔ ڈاکٹر شازیہ سومرو نے الزام عائد کیا کہ وفاقی وزیر صحت اجلاس میں آ کر کہانیاں سناتے ہیں لیکن پمز سانحے پر اب تک کوئی عملی کارروائی نہیں ہوئی۔ انہوں نے یاد دلایا کہ گزشتہ اجلاس میں بھی اسی معاملے پر واک آؤٹ کیا گیا تھا، تاہم کوئی پیش رفت نہیں ہوئی۔

ڈاکٹر شازیہ سومرو نے مزید کہا کہ گزشتہ تین سالوں کے دوران پمز اسپتال کو 22 ارب روپے فراہم کیے گئے، اس لیے اسپتال کی آڈٹ رپورٹ کمیٹی کے سامنے پیش کی جانی چاہیے۔ اس پر وفاقی وزیر صحت مصطفیٰ کمال نے جواب دیا کہ وزارت صحت پمز سانحے کی انکوائری رپورٹ پر عمل درآمد کر چکی ہے اور مزید انکوائری وزارت داخلہ کے سپرد کر دی گئی ہے۔ ان کا کہنا تھا کہ پمز سانحے کے حوالے سے وزارت صحت کی جانب سے کوئی معاملہ زیر التوا نہیں ہے۔

اجلاس میں ایم ڈی کیٹ امتحان 2026 کے نتائج اور جائزے کے علاوہ امتحان کو تین سال تک مؤثر رکھنے کے فیصلے پر بھی غور کیا گیا۔ چیئرمین کمیٹی ڈاکٹر مہیش کمار نے استفسار کیا کہ اس فیصلے پر اب تک عمل درآمد کیوں نہیں ہوا۔ وفاقی وزیر صحت نے بتایا کہ وزارت صحت نے اس فیصلے کی منظوری دے کر معاملہ کابینہ کو بھجوا دیا ہے اور تجویز دی کہ سیکریٹری کابینہ کو خط لکھا جائے تاکہ پیش رفت ہو سکے۔ چیئرمین کمیٹی نے رواں سال کے ایم ڈی کیٹ سیشن پر بھی اس فیصلے کو نافذ کرنے کی ہدایت کی۔

کمیٹی نے آئندہ ایم ڈی کیٹ امتحان کے دوران طلبہ کو سوالنامہ فراہم کرنے کی تجویز پر بھی غور کیا اور مختلف جامعات کے وائس چانسلرز نے امتحان کے انعقاد کے حوالے سے کمیٹی کو بریفنگ دی۔ اس کے علاوہ نجی میڈیکل کالجز کی فیسوں کے معاملے پر ارکان نے تشویش کا اظہار کیا۔ ڈاکٹر شازیہ سومرو نے کہا کہ 45 میڈیکل کالجز کی فہرست پی ایم ڈی سی کو فراہم کی گئی تھی جو 25 لاکھ روپے سے زائد فیسیں وصول کر رہے ہیں، جبکہ طلبہ نے شکایت کی ہے کہ کالجز ان سے مزید 6 لاکھ روپے مانگ رہے ہیں۔

وفاقی وزیر صحت مصطفیٰ کمال نے بتایا کہ 65 اداروں نے پی ایم ڈی سی کو اپنے اخراجات زیادہ ہونے سے آگاہ کیا تھا، جن میں سے 35 میڈیکل کالجز نے اخراجات کی تفصیلات فراہم کیں اور انہیں 18 سے 21 لاکھ روپے تک فیس وصول کرنے کی اجازت دی گئی۔ ان کا کہنا تھا کہ بعض کالجز عدالتوں سے حکم امتناعی لے آئے تھے، تاہم اب وہ ختم ہو چکا ہے۔ صدر پی ایم ڈی سی نے کمیٹی کو بتایا کہ اضافی فیسیں وصول کرنے والے میڈیکل کالجز کو شوکاز نوٹس جاری کیے گئے ہیں، جبکہ ڈاکٹر شازیہ سومرو نے ایسے کالجز کی رجسٹریشن منسوخ کرنے کی تجویز دی، جس پر صدر پی ایم ڈی سی نے کہا کہ رجسٹریشن منسوخ کرنا آخری آپشن ہوتا ہے۔

اجلاس کے دوران چیئرمین کمیٹی نے وزارت صحت کے سیکریٹریز کی بار بار تبدیلی پر بھی گلہ کیا، جس پر مصطفیٰ کمال نے جواب دیا کہ اس معاملے پر وہ بھی چیئرمین کمیٹی کے ساتھ ہیں۔