کراچی کی 121 کم کارکردگی والی یونین کونسلز میں حفاظتی ٹیکوں کی خصوصی مہم جاری

سندھ کے توسیعی پروگرام برائے حفاظتی ٹیکہ جات (ای پی آئی) کی جانب سے کراچی کی 121 کم کارکردگی والی یونین کونسلز میں بچوں کے حفاظتی ٹیکوں کے لیے خصوصی مہم جاری ہے۔ اس مہم کا مقصد معمول کی ویکسینیشن کی کوریج کو بہتر بنانا اور ان بچوں تک پہنچنا ہے جو اب تک کسی بھی حفاظتی ٹیکے سے محروم رہے ہیں یا جن کا مقررہ ویکسینیشن کورس ادھورا رہ گیا ہے۔

اس سلسلے میں ضلع کورنگی کے ڈسٹرکٹ ہیلتھ آفیسر ڈاکٹر اشفاق حسین میمن نے نصیر کالونی کے علاقے میں واقع افسری کلینک سیکٹر ڈی کا دورہ کیا اور فیلڈ میں جاری ویکسینیشن سرگرمیوں کا جائزہ لیا۔ دورے کے دوران انہوں نے ویکسینیشن ٹیم کی کارکردگی کا معائنہ کیا، بچوں کو ٹیکے لگانے کے عمل، محروم رہ جانے والے بچوں کی نشاندہی اور گھر گھر جا کر بچوں تک رسائی کے اقدامات کا جائزہ لیا۔

خصوصی مہم کے تحت صفر خوراک لینے والے بچوں اور ایسے بچوں کو تلاش کر کے حفاظتی ٹیکے فراہم کیے جا رہے ہیں جنہوں نے ویکسینیشن کا کورس مکمل نہیں کیا۔ ای پی آئی سندھ کے مطابق اس سرگرمی کا بنیادی مقصد معمول کی ویکسینیشن کی کوریج میں بہتری لانا، رہ جانے والے بچوں کو حفاظتی ٹیکوں کے دائرے میں لانا اور والدین میں بروقت ویکسینیشن سے متعلق آگاہی پیدا کرنا ہے۔

اس اقدام کا مقصد بچوں کو قابلِ تدارک بیماریوں سے محفوظ بنانا ہے، تاکہ وہ صحت کے حوالے سے درپیش خطرات سے محفوظ رہ سکیں۔ ماہرین صحت کے مطابق بروقت اور مکمل ویکسینیشن نہ صرف بچے بلکہ پوری کمیونٹی کی صحت کے لیے اہم ہے، اور ایسی مہمات ان علاقوں میں خاصی اہمیت رکھتی ہیں جہاں ویکسینیشن کی شرح کم ہے۔

یاد رہے کہ حفاظتی ٹیکہ جات کے پروگرام کے تحت پولیو، خسرہ، تشنج اور دیگر بیماریوں سے بچاؤ کے ٹیکے مفت فراہم کیے جاتے ہیں، اور والدین کو چاہیے کہ وہ اپنے بچوں کے ویکسینیشن کارڈ کا باقاعدگی سے جائزہ لیں تاکہ کوئی خوراک رہ نہ جائے۔