ایف آئی اے کی راولپنڈی اور اسلام آباد میں کارروائیاں، غیر قانونی ایمپلائمنٹ ایجنسی اور ویزا فراڈ نیٹ ورک بے نقاب

فیڈرل انویسٹی گیشن ایجنسی (ایف آئی اے) نے راولپنڈی اور اسلام آباد میں الگ الگ کارروائیاں کرتے ہوئے ایک غیر قانونی اوورسیز ایمپلائمنٹ ایجنسی اور ایک ویزا فراڈ نیٹ ورک کا پردہ فاش کیا ہے۔ حکام کے مطابق ان کارروائیوں میں ایجنسی کے سی ای او اور مینجر سمیت متعدد افراد کو گرفتار کر لیا گیا ہے۔

ایف آئی اے اسلام آباد زون کے اینٹی ہیومن ٹریفکنگ سرکل نے راولپنڈی کے علاقے چاندنی چوک میں واقع راول مال اینڈ ریذیڈنشیا کے دفاتر نمبر 305 اور 306 پر چھاپہ مارا، جہاں ’فینکس ایچ آر کنسلٹنٹ‘ کے نام سے ایک اوورسیز ایمپلائمنٹ ایجنسی بغیر کسی قانونی لائسنس کے چلائی جا رہی تھی۔ بیورو آف امیگریشن اینڈ اوورسیز ایمپلائمنٹ نے تصدیق کی ہے کہ یہ ادارہ کسی قانونی اجازت کے بغیر غیر ملکی بھرتی کی سرگرمیاں انجام دے رہا تھا اور امیدواروں کے انٹرویوز کا اہتمام کر رہا تھا۔

چھاپے کے دوران ایس ایچ او انسپکٹر عاشر ہارون کی نگرانی میں ٹیم نے ایجنسی کے سی ای او یاسر عرفات اور مینجر حاجی وقار کو موقع پر ہی گرفتار کر لیا۔ کارروائی کے وقت دفتر میں تقریباً 15 امیدواروں کے انٹرویوز جاری تھے۔ تلاشی کے دوران متعدد پاسپورٹ، امیدواروں کے انٹرویو ریکارڈز اور تشہیری بینرز برآمد کیے گئے، جبکہ ملزمان کے خلاف امیگریشن آرڈیننس 1979ء اور تعزیرات پاکستان کی متعلقہ دفعات کے تحت مقدمہ درج کر لیا گیا ہے۔

دوسری جانب اسلام آباد زون کے اینٹی ہیومن ٹریفکنگ سرکل نے برطانیہ ورک ویزا فراڈ میں ملوث ملزم سید ماجد حسین کو راولپنڈی سے گرفتار کیا۔ متاثرہ شہری کے مطابق ملزم نے اپنے بھتیجے نعمان علی کو برطانیہ میں بطور میسن ورک ویزا بھجوانے کا جھانسہ دے کر 34 ہزار پاؤنڈ اور چار لاکھ 65 ہزار روپے وصول کیے۔ بعدازاں صرف 25 ہزار 500 پاؤنڈ واپس کیے گئے، جبکہ باقی ماندہ آٹھ ہزار 500 پاؤنڈ اور چار لاکھ 65 ہزار روپے اب تک واپس نہیں کیے گئے۔

ایف آئی اے اسلام آباد زون کے ڈائریکٹر شہزاد ندیم بخاری نے کہا ہے کہ یہ ادارہ غیر قانونی اوورسیز ایمپلائمنٹ ایجنسیوں اور انسانی اسمگلنگ میں ملوث عناصر کے خلاف قانونی کارروائیاں جاری رکھنے کے لیے پرعزم ہے۔ واضح رہے کہ غیر قانونی بھرتی کی سرگرمیاں ملکی شہریوں کو بیرون ملک نوکری کے نام پر مالی نقصان اور قانونی پیچیدگیوں میں مبتلا کر سکتی ہیں، اس لیے عوام کو مشورہ دیا جاتا ہے کہ وہ کسی بھی اوورسیز ایمپلائمنٹ ایجنسی سے رابطے سے قبل اس کا لائسنس لازمی طور پر جانچ لیں۔