پشاور: نادرا اسسٹنٹ ڈائریکٹر قتل کیس، ملزمان کے نام ای سی ایل میں شامل

پشاور کے علاقے حیات آباد میں نادرا کے اسسٹنٹ ڈائریکٹر کے قتل کیس کی تحقیقات میں اہم پیشرفت سامنے آئی ہے۔ ایس ایس پی انویسٹی گیشن محمد سمیع کے مطابق فرار ہونے والے ملزمان کے نام ایگزٹ کنٹرول لسٹ (ای سی ایل) میں شامل کر دیے گئے ہیں اور نادرا سمیت دیگر اداروں کو ملزمان کے بارے میں مکمل طور پر آگاہ کر دیا گیا ہے۔

پولیس افسر نے بتایا کہ سیف سٹی کیمراں سے تمام راستوں کی فوٹیج حاصل کر لی گئی ہے جس کے مطابق واردات کے بعد ملزمان شہر کی سدرن روڈ سے فرار ہوئے۔ ملزمان کی شناخت کریمینل ڈیٹا سسٹم میں موجود ہے جبکہ ان کے شناختی کارڈز بھی بلاک کر دیے گئے ہیں۔

تحقیقات کے مطابق مقتول اسسٹنٹ ڈائریکٹر فہد کو یونیورسٹی ٹاؤن سے تعاقب کیا گیا جو اپنی بلٹ پروف گاڑی میں حیات آباد تک آئے تھے۔ ملزمان نے مبینہ طور پر دشمنی کی بنیاد پر انہیں قتل کیا۔ پولیس کے مطابق قتل سے قبل ملزمان نے نادرا اسسٹنٹ ڈائریکٹر کے معمولات اور مقام کا کئی بار جائزہ لیا تھا۔

ایس ایس پی انویسٹی گیشن کے مطابق چونکہ مقتول بلٹ پروف گاڑی استعمال کرتے تھے اس لیے مرکزی ملزم نے اپنے ساتھی کو سواری بنا کر نادرا دفتر تک گاڑی کا تعاقب کیا اور شوٹر گھر سے نادرا آفس تک اسسٹنٹ ڈائریکٹر کا پیچھا کرتا رہا۔ یہ واردات 6 نومبر کو علاقہ حیات آباد میں نادرا دفتر کے باہر پیش آئی تھی جس کے بعد ملزمان فرار ہونے میں کامیاب ہو گئے تھے۔

واضح رہے کہ مقتول نادرا اسسٹنٹ ڈائریکٹر رکن قومی اسمبلی نور عالم کے بھانجے تھے۔ پولیس نے ملزمان کی شناخت کے باوجود اب تک ان کی گرفتاری کی تصدیق نہیں کی ہے تاہم تفتیشی ٹیم نے دعویٰ کیا ہے کہ ملزمان کو جلد قانون کے کٹہرے میں لایا جائے گا۔