کراچی: اورنگی ٹاؤن میں اراضی قبضے کے معاملے پر سندھ حکومت اور کے ایم سی کو عدالتی نوٹس

کراچی کی سٹی کورٹ میں سینیئر سول جج غربی کی عدالت نے اورنگی ٹاؤن میں دو ایکڑ سے زائد اراضی پر مبینہ قبضے اور غیر قانونی تجارتی لیز جاری کرنے کے معاملے پر حکومت سندھ، کے ایم سی، کے ڈی اے اور دیگر فریقین کو نوٹس جاری کرتے ہوئے 23 نومبر تک جواب طلب کرلیا ہے۔ یہ حکم پاکستان ریڈ کریسنٹ سوسائٹی کی جانب سے دائر کی گئی درخواست پر دیا گیا۔

درخواست میں مؤقف اختیار کیا گیا ہے کہ زیرِ بحث پلاٹ 1968 میں فلاحی مقاصد کے لیے 99 سالہ لیز پر الاٹ کیا گیا تھا، جس کی لیز دستاویز 1980 میں رجسٹرڈ ہوئی۔ 2011 میں دستاویز میں موجود ایک غلطی کی تصحیح کرتے ہوئے کے ایم سی نے خود لیز کی مدت 99 سال تک تسلیم کر لی تھی۔

سوسائٹی کے وکیل عثمان فاروق ایڈووکیٹ کے مطابق اس پلاٹ پر گزشتہ کئی دہائیوں سے ڈسپنسری، ویکسینیشن سینٹر، جنرل وارڈ اور ہنگامی امدادی سامان کا گودام قائم ہے، جہاں غریب اور مستحق افراد کو طبی و فلاحی سہولتیں فراہم کی جاتی ہیں۔ تاہم الزام ہے کہ قبضہ مافیا نے اس اراضی پر 94 سے 100 کے قریب دکانیں تعمیر کرلیں، جنہیں متعلقہ محکمے کی پشت پناہی بھی حاصل رہی۔

درخواست میں یہ بھی کہا گیا ہے کہ کے ایم سی حکام نے پہلے سے فلاحی مقاصد کے لیے لیز شدہ پلاٹ کے بعض حصوں کو مختلف افراد کے نام تجارتی بنیادوں پر لیز پر بھی دے دیا۔ درخواست گزار نے عدالت سے استدعا کی ہے کہ سوسائٹی کے نام جاری 99 سالہ لیز کو قانونی قرار دیا جائے اور کے ایم سی کے متنازع خط اور اشتہار کو غیر قانونی قرار دے کر منسوخ کیا جائے۔

سوسائٹی نے عدالت سے یہ بھی استدعا کی ہے کہ قبضہ مافیا کے نام جاری کردہ تجارتی لیزوں کو منسوخ کیا جائے اور متعلقہ حکام کو پلاٹ کی حیثیت تبدیل کرنے یا کسی تیسرے فریق کے حقوق پیدا کرنے سے روکا جائے۔ درخواست میں مقدمے کے حتمی فیصلے تک عبوری حکم امتناع جاری کرنے کی بھی استدعا کی گئی ہے۔ عدالت نے تمام فریقین کو نوٹس جاری کرتے ہوئے 23 نومبر تک تحریری جواب جمع کرانے کی ہدایت کی ہے۔

یاد رہے کہ یہ معاملہ شہرِ قائد میں فلاحی و طبی سہولیات کے لیے مختص اراضی کے تحفظ سے جڑا ہے، اور عدالت کا فیصلہ اس بات کا تعین کرے گا کہ فلاحی اداروں کو دی گئی لیزوں کے تحفظ اور غیر قانونی تجارتی استعمال کے خلاف کارروائی کے درمیان توازن کیسے قائم ہوتا ہے۔