سندھ حکومت کا تھرپارکر کو آفت زدہ ضلع قرار دینے کا فیصلہ، 90 فیصد فصلیں تباہ

سندھ حکومت نے تھرپارکر میں خشک سالی کی شدت کے پیش نظر ضلع کو آفت زدہ قرار دینے کا فیصلہ کیا ہے۔ وزیراعلیٰ سندھ مراد علی شاہ کو دی گئی تفصیلی بریفنگ میں بتایا گیا کہ ضلع کے تمام سات تعلقوں میں خشک سالی جیسی صورتحال ہے، جہاں 85 سے 90 فیصد فصلیں تباہ یا غیر پیداواری ہو چکی ہیں۔ محکمہ زرعی توسیع کے مطابق فصلوں کو تقریباً 90 فیصد نقصان پہنچا ہے۔

بریفنگ کے دوران حکام نے بتایا کہ رواں سال ستمبر میں تھرپارکر کے ساتوں تعلقوں میں صرف ایک سے 36 ملی میٹر بارش ریکارڈ ہوئی۔ غیر متوازن بارشوں کے باعث فصلیں اور قدرتی گھاس پکنے سے پہلے ہی خشک ہو گئیں، جس سے مقامی آبادی اور مویشیوں کی معیشت بری طرح متاثر ہوئی ہے۔

وزیراعلیٰ سندھ نے ہدایت کی کہ تھرپارکر کے عوام کو پینے کے پانی کی فراہمی ہر حال میں یقینی بنائی جائے۔ انہوں نے غیر فعال آر او پلانٹس کی فوری مرمت کرکے انہیں فعال کرنے اور پانی کی فراہمی کے تمام موجودہ ذرائع کو بحال کرنے کی بھی ہدایت کی تاکہ متاثرہ علاقوں میں پانی کی قلت پر قابو پایا جا سکے۔

انہوں نے چیف سیکریٹری کو ہدایت کی کہ نؤکوٹ سے مٹھی تک پانی کی لائن بچھانے کی فزیبلٹی کا جائزہ لیا جائے اور پانی کی فراہمی کے لیے طویل المدتی منصوبہ بندی تیار کی جائے۔ اس اقدام کا مقصد خشک سالی جیسے حالات میں پائیدار حل فراہم کرنا ہے۔

مراد علی شاہ نے خشک سالی کے باعث متاثر ہونے والے مویشیوں کے تحفظ کے لیے اقدامات سے متعلق سفارشات تیار کرنے کی ہدایت کی اور کہا کہ خشک سالی سے متاثرہ علاقوں میں امدادی کارروائیوں کی مسلسل نگرانی کی جائے۔ ان کا کہنا تھا کہ تھرپارکر کے متاثرہ عوام کو تنہا نہیں چھوڑا جائے گا اور سندھ حکومت ہر ممکن مدد فراہم کرے گی۔

وزیراعلیٰ نے واضح کیا کہ عوام کو پینے کا پانی فراہم کرنا، مویشیوں کا تحفظ اور متاثرہ خاندانوں کو ریلیف دینا حکومت کی اولین ترجیح ہے۔ خشک سالی سے نمٹنے کے لیے دی گئی ہدایات پر عمل درآمد کے لیے متعلقہ محکموں کو فوری اقدامات کا پابند کیا گیا ہے۔