خلیجی ممالک کی معیشتوں کو اربوں ڈالر کا نقصان، رپورٹ میں 790 ارب ڈالر تک کے اثرات کا خدشہ

عالمی بیمہ کمپنی الیانز ٹریڈ کی تازہ رپورٹ میں انکشاف ہوا ہے کہ خلیجی خطے میں جاری جنگ نے رکن ممالک کی معیشتوں کو شدید نقصان پہنچایا ہے اور اب تک 200 ارب ڈالر سے زائد مالیت کا نقصان ہو چکا ہے۔ خبر رساں ادارے اے ایف پی کے مطابق رپورٹ میں خبردار کیا گیا ہے کہ ان اثرات کا دائرہ 2030 تک پھیلتا رہے گا اور مجموعی نقصان 790 ارب ڈالر تک پہنچ سکتا ہے۔

رپورٹ کے مطابق نقصان کا سب سے بڑا بوجھ ان معیشتوں پر پڑا ہے جو آبنائے ہرمز پر انحصار کرتی ہیں، خصوصاً توانائی کے شعبے کو سب سے زیادہ نقصان اٹھانا پڑا۔ جنگ کے دوران خلیجی خطے میں توانائی کی 80 سے زائد تنصیبات کو نشانہ بنایا گیا جن میں اکثریت کویت، قطر اور بحرین میں واقع ہے اور بیشتر کو شدید نقصان پہنچا۔

اثرات صرف توانائی کے شعبے تک محدود نہیں رہے بلکہ سیاحت اور جائیداد کے کاروبار بھی متاثر ہوئے ہیں، جس کے باعث آنے والے برسوں میں ان شعبوں کی ترقی کی رفتار سست رہنے کا امکان ظاہر کیا گیا ہے۔ رپورٹ میں بتایا گیا ہے کہ خلیجی ممالک نقصانات کی تلافی کے لیے بڑے ترقیاتی منصوبوں کی بجائے دفاع، بنیادی ڈھانچے اور ملکی ضروریات پر اخراجات بڑھانے پر توجہ دیں گے۔

الیانز ٹریڈ کے تخمینے کے مطابق 2026 سے 2030 کے دوران خلیج تعاون کونسل کے رکن ممالک کی مجموعی معاشی پیداوار جنگ سے پہلے کی متوقع شرح کے مقابلے میں 5.9 فیصد کم رہ سکتی ہے، جس کی مالی مالیت 790 ارب ڈالر بنتی ہے۔ یہ کمی خطے کی طویل المدتی معاشی ترقی کے لیے اہم چیلنج قرار دی جا رہی ہے۔

ماہرین کے مطابق توانائی کی تنصیبات، سیاحت اور جائیداد کے شعبوں میں یکساں طور پر نقصان نے خلیجی معیشتوں کے تنوع کے منصوبوں کو بھی متاثر کیا ہے اور سرمایہ کاری کی رفتار سست ہونے کا خطرہ ہے۔ رپورٹ میں حکام پر زور دیا گیا ہے کہ طویل المدتی معاشی استحکام کے لیے متبادل حکمت عملی اپنائی جائے۔

واضح رہے کہ خلیجی ممالک کی معیشتیں برآمدات اور توانائی کی آمدنی پر انحصار کرتی ہیں، اس لیے ان شعبوں میں خلل پڑنے سے خطے کی مجموعی معاشی کارکردگی پر دیرپا اثرات مرتب ہو سکتے ہیں۔