ایران نے جوہری معلومات پر امریکی انعام کی پیشکش مسترد کر دی

ایران نے اپنے جوہری پروگرام سے متعلق خفیہ معلومات فراہم کرنے پر امریکا کی جانب سے دو کروڑ ڈالر کے انعام کی پیشکش کو مسترد کرتے ہوئے اسے قابل نفرت اور افسوسناک اقدام قرار دیا ہے۔ ایرانی وزیر خارجہ عباس عراقچی نے کہا کہ کسی بھی مہذب ملک کو ایسی پیشکش زیب نہیں دیتی جس کا مقصد ایک پرامن جوہری پروگرام کی جاسوسی کو ہوا دینا ہو۔

عالمی خبر رساں ادارے کے مطابق امریکا نے گزشتہ ہفتے ایران کے جوہری پروگرام سے متعلق اہم معلومات فراہم کرنے والے افراد کے لیے دو کروڑ ڈالر تک انعام اور ممکنہ طور پر محفوظ مقام پر منتقلی کی پیشکش کی تھی۔ امریکی فوج کے مطابق انعام کے حصول کے لیے ایران کی جوہری تنصیبات، آلات اور اس پروگرام سے وابستہ اہلکاروں کے بارے میں معلومات فراہم کرنا ضروری ہوگا۔

ایرانی وزیر خارجہ نے اقوام متحدہ، سلامتی کونسل اور بین الاقوامی جوہری توانائی ایجنسی سے مطالبہ کیا ہے کہ وہ امریکی اعلان کی واضح اور غیر مبہم الفاظ میں مذمت کریں۔ انہوں نے ایک بار پھر اپنے ملک کے اس مؤقف کا اعادہ کیا کہ ایران کا جوہری پروگرام مکمل طور پر پرامن مقاصد کے لیے ہے اور اسے جوہری ہتھیاروں کی تیاری سے جوڑنا درست نہیں۔

واضح رہے کہ ایران کے جوہری پروگرام پر سابق امریکی صدر باراک اوباما کے دور میں عالمی قوتوں کے ساتھ ایک معاہدہ طے پایا تھا، جسے موجودہ صدر ڈونلڈ ٹرمپ نے اپنے گزشتہ دور میں منسوخ کر دیا تھا۔ اس معاہدے کی منسوخی کے بعد ایران اور مغربی ممالک کے درمیان جوہری معاملات پر کشیدگی میں اضافہ دیکھا گیا ہے۔

ماہرین کے مطابق اس طرح کی مالی پیشکشیں بین الاقوامی سطح پر جوہری معلومات کے حصول کے طریقوں سے متعلق بحث کو ہوا دے سکتی ہیں، جبکہ ایران کا موقف ہے کہ اس کے جوہری پروگرام کی نگرانی بین الاقوامی جوہری توانائی ایجنسی کے فریم ورک کے تحت ہوتی ہے۔ اس پیش رفت سے خطے میں جوہری معاملات پر جاری سفارتی کوششوں پر اثر پڑنے کا امکان ہے۔