ایران نے زیرِ زمین میزائل مرکز کی ویڈیو جاری کر دی

ایران نے اپنے زیرِ زمین میزائل ذخیرے کی نئی ویڈیو جاری کی ہے جس میں پاسدارانِ انقلاب کے خفیہ میزائل مرکز اور وہاں موجود بیلسٹک اور کروز میزائلوں کی جھلک دکھائی گئی ہے۔ ایرانی خبر رساں ادارے تسنیم کے مطابق یہ ویڈیو 10 نومبر کو پاسدارانِ انقلاب کی ایرو اسپیس فورس نے جاری کی۔

رپورٹ کے مطابق اس زیرِ زمین مرکز میں بیلسٹک اور کروز میزائلوں کے علاوہ انہیں داغنے کے لیے استعمال ہونے والے لانچنگ نظام بھی موجود ہیں۔ اس موقع پر ایرانی مسلح افواج کے چیف آف اسٹاف میجر جنرل علی عبداللہی اور پاسدارانِ انقلاب کی ایرو اسپیس فورس کے کمانڈر بریگیڈیئر جنرل مجید موسوی بھی موجود تھے۔

تاہم ایرانی حکام نے اس میزائل مرکز کے مقام اور وہاں موجود میزائلوں کی مجموعی تعداد ظاہر نہیں کی۔ واضح رہے کہ پاسدارانِ انقلاب کے ترجمان بریگیڈیئر جنرل حسین محبی نے حال ہی میں کہا تھا کہ میزائلوں اور ڈرونز کی تیاری کے تمام مراکز کو زیرِ زمین منتقل کیا جائے گا۔

اس اقدام کا مقصد ممکنہ امریکی اور اسرائیلی فضائی حملوں سے میزائلوں، ڈرونز اور ان کی تیاری کے مراکز کو محفوظ رکھنا بتایا جاتا ہے۔ تجزیہ کاروں کے مطابق یہ پیش رفت خطے میں بڑھتی کشیدگی کے تناظر میں سامنے آئی ہے۔

واضح رہے کہ امریکی وسط مدتی انتخابات میں ٹرمپ کی جماعت کی ناکامی اور اسرائیلی الیکشن میں نیتن یاہو کی شکست کے باوجود خطے میں تاحال ایران جنگ کے باعث حالات کشیدہ ہیں۔