جسٹس جمال مندوخیل کا عدلیہ کی آزادی اور آئین کی بالادستی پر زور

سپریم کورٹ آف پاکستان کے جج جسٹس جمال مندوخیل نے کہا ہے کہ عدلیہ کو ایگزیکٹو سے الگ رہ کر کام کرنا چاہیے تاکہ قانون کسی بااثر شخص کی خواہش کا غلام نہ بن سکے۔ یہ بات انہوں نے اپنے اعزاز میں منعقدہ الوداعی ریفرنس سے خطاب کرتے ہوئے کہی، جس میں انہوں نے عدلیہ کی آزادی، آئین کی بالادستی اور قانون تک مساوی رسائی پر تفصیل سے روشنی ڈالی۔

جسٹس جمال مندوخیل کا کہنا تھا کہ آئین کے تحت اختیارات کسی شخص کی ذاتی ملکیت نہیں بلکہ ایک امانت ہیں، اور آئین ہی وہ دستاویز ہے جو پارلیمنٹ، عدلیہ اور انتظامیہ کے اختیارات کی حدود کا تعین کرتی ہے۔ انہوں نے کہا کہ ریاست کے دیگر اداروں کی نگرانی کرنا عدلیہ کا آئینی فرض ہے اور یہ کہ عدلیہ کو یہ اختیار حاصل ہے کہ وہ آئین کی تشریح کرے اور اس پر دیانت داری سے عمل درآمد کو یقینی بنائے۔

انہوں نے کہا کہ آزاد عدلیہ کی بات تو کی جاتی ہے، تاہم عدلیہ کو آزاد ہونے کے ساتھ ساتھ آئین اور قانون کا پابند بھی ہونا چاہیے۔ ان کے بقول ایک جج کی قابلیت، دیانت داری اور کردار کا اصل معیار اس کے عدالتی فیصلے ہوتے ہیں اور حلف ہی وہ چیز ہے جو ایک جج کو تقویت دیتی ہے، اس لیے جج کو اپنا حلف ہمیشہ یاد رکھنا چاہیے۔

جسٹس جمال مندوخیل نے مزید کہا کہ عام شہریوں کو بھی حقوق اور قانون تک اس طرح رسائی حاصل ہونی چاہیے جیسے طاقتور اور بااثر افراد کو حاصل ہے۔ انہوں نے زور دیا کہ عدالتیں سائلین کے لیے خوف کی جگہ نہیں بلکہ ان کے لیے تحفظ کی ضمانت ہونی چاہیں، جبکہ جو لوگ آئین اور قانون کی خلاف ورزی کرتے ہیں انہیں عدالتوں سے خوفزدہ ہونا چاہیے۔ ان کے مطابق عدلیہ کی آزادی کوئی استحقاق نہیں بلکہ عوام کے حقوق کے تحفظ کی ضمانت ہے۔

انہوں نے بتایا کہ بطور جج انہیں سب سے زیادہ تعاون جسٹس نعیم اختر افغان اور جسٹس ہاشم کاکڑ نے فراہم کیا، اور کہا کہ اکیلے انسان کی حیثیت کچھ نہیں ہوتی، صلاح مشورے سے کیے گئے فیصلے ہی بہتر ہوتے ہیں۔ انہیں امید ظاہر کی کہ پارلیمنٹ بھی اجتماعی دانش کے تحت فیصلے کرے گی۔

ریفرنس سے خطاب کرتے ہوئے اٹارنی جنرل منصور عثمان اعوان نے کہا کہ جسٹس جمال مندوخیل کی خدمات کو ہمیشہ یاد رکھا جائے گا۔ انہوں نے بتایا کہ جسٹس جمال مندوخیل اسکول میں فٹبال ٹیم کے کپتان رہے اور ان کی قیادت کی صلاحیت قانونی امور میں بھی برقرار رہی۔ اٹارنی جنرل کے مطابق انہوں نے بطور چیف جسٹس بلوچستان ہائی کورٹ اور بطور جج سپریم کورٹ سول، سروس اور کرمنل کیسز میں اہم اور تاریخی فیصلے دیے۔