نارتھ ناظم آباد کے نجی اسپتال پر چھاپہ، سرکاری ای پی آئی ویکسین برآمد

کراچی کے علاقے نارتھ ناظم آباد میں ڈسٹرکٹ ہیلتھ آفس ضلع وسطی نے ایک نجی اسپتال پر اسسٹنٹ کمشنر کے ہمراہ مشترکہ کارروائی کرتے ہوئے سرکاری ای پی آئی ویکسین برآمد کر لی ہے۔ یہ کارروائی ڈسٹرکٹ ہیلتھ آفس کو موصول ہونے والی معلومات کی بنیاد پر کی گئی، جن میں بتایا گیا تھا کہ نجی ادارے میں سرکاری ویکسین استعمال یا ذخیرہ کی جا رہی ہے۔

ڈسٹرکٹ ہیلتھ آفس کے مطابق برآمد شدہ ویکسین کی گنتی کر کے اسے سیل کر دیا گیا ہے اور یہ فی الوقت ڈسٹرکٹ ویکسین اسٹور کی تحویل میں ہے۔ ویکسین کے بیچ نمبرز کو ضلعی سپلائی ریکارڈ سے ملانے کا عمل جاری ہے تاکہ یہ واضح کیا جا سکے کہ یہ اسٹاک کس مرکز سے اور کس طریقے سے نجی اسپتال تک پہنچا۔

واقعے کے اگلے روز ڈسٹرکٹ ہیلتھ آفیسر نے سپلائی سے منسلک پائے جانے والے سرکاری ویکسینیشن افسر کو فوری طور پر ڈیوٹی سے ہٹا دیا اور سندھ سول سرونٹس (ایفیشنسی اینڈ ڈسپلن) رولز 1973 کے تحت باقاعدہ انکوائری کمیٹی تشکیل دے دی۔ نجی اداروں کی مؤثر نگرانی اور قانونی کارروائی کو یقینی بنانے کے لیے سندھ ہیلتھ کیئر کمیشن اور ڈرگ کنٹرول ایڈمنسٹریشن سے بھی رابطہ کیا جا رہا ہے۔

ترجمان کے مطابق اس واقعے کو بعض اخباری رپورٹس میں ڈسٹرکٹ ہیلتھ آفس کی ناکامی کے طور پر پیش کیا گیا، جبکہ حقیقت یہ ہے کہ معاملہ خود محکمے کی کارروائی کے نتیجے میں سامنے آیا اور تمام ضروری اقدامات خبر کی اشاعت سے قبل ہی کیے جا چکے تھے۔ دفاتر نے اس حوالے سے اپنا مؤقف بھی واضح کیا ہے۔

ڈسٹرکٹ ہیلتھ آفس نے ان بچوں کی نشاندہی کا کام بھی شروع کر دیا ہے جنہیں ممکنہ طور پر اسی برآمد شدہ اسٹاک سے ویکسین لگائی گئی ہو، اور ایسے بچوں کی مفت دوبارہ ویکسینیشن کے انتظامات کیے جا رہے ہیں تاکہ ان کی حفاظت کو یقینی بنایا جا سکے۔

والدین کو واضح کیا گیا ہے کہ ای پی آئی کی تمام ویکسین سرکاری مراکز پر بالکل مفت دستیاب ہیں اور کسی کو بھی ان ویکسین کی قیمت وصول کرنے یا گھر پر پیسوں کے عوض لگانے کی اجازت نہیں۔ کسی بھی قسم کی رقم طلب کیے جانے کی صورت میں قریبی سرکاری ای پی آئی مرکز یا ڈسٹرکٹ ہیلتھ آفس ضلع وسطی کو اطلاع دینے کی ہدایت کی گئی ہے، جبکہ محکمہ سرکاری ویکسین کے غلط استعمال کے خلاف زیرو ٹالرنس پالیسی پر عمل پیرا ہے۔