یورپ کے تین ممالک میں 7 ہزار سے زائد اسکولوں کو بم کی دھمکیاں، تحقیقات میں خطرے کے شواہد نہیں

یورپ کے تین ممالک اٹلی، اسکاٹ لینڈ اور شمالی آئرلینڈ میں سات ہزار سے زائد اسکولوں کو بم دھماکوں کی دھمکی آمیز ای میلز موصول ہونے کے بعد افراتفری پھیل گئی اور متعدد تعلیمی اداروں کو احتیاطی طور پر خالی کرایا گیا۔ برطانوی نشریاتی ادارے بی بی سی کے مطابق بدھ کے روز اٹلی کے تقریباً چھ ہزار تین سو اسکولوں، اسکاٹ لینڈ کے چار سو ستر اور شمالی آئرلینڈ کے تین سو سے زائد تعلیمی اداروں کو یہ دھمکیاں بھیجی گئیں۔

اٹلی میں متعدد اسکولوں کو خالی کرا کر طلبہ کو محفوظ مقامات پر منتقل کیا گیا تاہم وزیراعظم جارجیا میلونی نے کہا کہ ابتدائی تحقیقات میں کسی حقیقی خطرے کے شواہد نہیں ملے اور ان دھمکیوں کا مقصد خوف و بے چینی پھیلانا معلوم ہوتا ہے۔ اسکاٹ لینڈ کی پولیس نے بھی پیغامات کو جعلی قرار دیتے ہوئے کہا کہ عوام کو کوئی خطرہ نہیں۔ شمالی آئرلینڈ کے تعلیمی حکام نے اسکولوں کو ہدایت دی کہ وہ پولیس کی ہدایت کے بغیر تعلیمی ادارے بند نہ کریں۔

اطالوی حکام کے مطابق دھمکی آمیز پیغام بھیجنے والے شخص نے خود کو میخائل اینڈروپوف ظاہر کیا تھا جبکہ اسکاٹ لینڈ کے اسکولوں کو بھی اسی نام سے ملتا جلتا پیغام موصول ہوا۔ حکام سائبر جرائم کے ماہرین کی مدد سے ای میلز بھیجنے والوں کا سراغ لگانے میں مصروف ہیں تاہم تاحال یہ واضح نہیں ہو سکا کہ ان واقعات کا آپس میں کوئی تعلق ہے یا نہیں۔

واضح رہے کہ گزشتہ سال بھی یورپ کے متعدد ممالک میں اسکولوں اور دیگر عوامی مقامات کو بم کی دھمکیوں کا سامنا رہا تھا جنہیں بعد ازاں جعلی قرار دیا گیا تھا۔ ماہرین کا کہنا ہے کہ اس طرح کی دھمکیاں اکثر سائبر حملہ آوروں کی جانب سے خوف پیدا کرنے یا توجہ حاصل کرنے کے لیے بھیجی جاتی ہیں اور ان سے نمٹنے کے لیے ہنگامی منصوبہ بندی اور تیز رفتار تحقیقات ضروری ہیں۔