ٹرمپ کا واشنگٹن میں 250 فٹ بلند فوجی یادگار بنانے کا اعلان، کینیڈی خاندان کی عدالت میں چیلنج

امریکی صدر ڈونلڈ ٹرمپ نے سابق فوجیوں کے اعزاز میں ایک بڑی یادگار کی تعمیر کا اعلان کیا ہے۔ عالمی میڈیا رپورٹس کے مطابق انہوں نے یہ اعلان 11 نومبر کو یومِ سابق فوجیان کے موقع پر آرلنگٹن نیشنل قبرستان میں منعقدہ تقریب سے خطاب کرتے ہوئے کیا۔ ٹرمپ کے مطابق جلد ہی ایک شاندار محراب کا افتتاح کیا جائے گا جو امریکی فوجیوں اور سابق فوجیوں کو خراجِ تحسین پیش کرے گی۔

صدر ٹرمپ کا کہنا تھا کہ امریکی فوجی اس عظیم الشان محراب کے قیام کا تقریباً دو سو سال سے انتظار کر رہے ہیں اور قانونی پیچیدگیوں کے باوجود یہ منصوبہ مکمل کیا جائے گا۔ مجوزہ یادگار کی بلندی تقریباً 250 فٹ ہوگی اور اسے واشنگٹن میں لنکن میموریل اور آرلنگٹن نیشنل قبرستان کے درمیان تعمیر کرنے کا منصوبہ ہے۔

تاہم اس منصوبے کے خلاف مزاحمت بھی تیز ہو گئی ہے۔ کینیڈی خاندان کے نو افراد نے عدالت سے رجوع کرتے ہوئے تعمیر کو روکنے کی درخواست دائر کی ہے۔ درخواست گزاروں کا مؤقف ہے کہ یہ بلند یادگار ان کے مرحومین کی قبروں اور سابق امریکی صدر جان ایف کینیڈی کے مزار کے منظر پر اثر ڈالے گی اور وہاں سایہ بھی ڈالے گی۔

اس سے قبل واشنگٹن اور ریاست ورجینیا کے حکام، سابق فوجیوں کے نمائندوں اور تاریخی ورثے کے تحفظ کے لیے کام کرنے والے افراد بھی اس منصوبے کے خلاف مقدمات دائر کر چکے ہیں۔ امریکی وفاقی جج تانیا چٹکن نے گزشتہ ہفتے تعمیراتی سرگرمیاں چودہ روز کے لیے روکنے کا حکم دیا تھا۔ منصوبے کے حامی اسے امریکی فوجیوں کے لیے خراجِ عقیدت قرار دیتے ہیں جبکہ مخالفین تاریخی مقامات کے تحفظ اور قانونی تقاضوں کی خلاف ورزی پر اعتراضات اٹھا رہے ہیں۔

واضح رہے کہ 3 نومبر کو ہونے والے امریکی وسط مدتی انتخابات میں صدر ٹرمپ کی جماعت ریپبلکن کو اپوزیشن جماعت سے شکست کا سامنا رہا، جس کے باعث انہیں اپنی مدت کے آئندہ دو سال میں منصوبوں کی منظوری کے حوالے سے مشکلات کا سامنا ہو سکتا ہے۔ یہ صورتحال اس یادگار کے منصوبے کی راہ میں قانونی اور سیاسی دونوں سطح پر رکاوٹوں کا امکان ظاہر کرتی ہے۔