آٹو پالیسی 2026-2031: گاڑیاں بنانے والے اداروں سے 2.72 ارب ڈالر برآمدات کی توقع

وزیراعظم کے مشیر برائے صنعت و پیداوار ہارون اختر خان نے کہا ہے کہ آٹو اور آٹو پارٹس مینوفیکچرنگ پالیسی 2026-2031 پاکستان کے آٹو موٹیو شعبے میں ایک بڑی تبدیلی کی عکاس ہے۔ اس پالیسی کا مقصد درآمدات پر انحصار کرنے والی محض اسمبلنگ کی صنعت کو برآمدات پر مبنی مینوفیکچرنگ، زیادہ سے زیادہ مقامی تیاری اور عالمی منڈی میں مسابقت کی صلاحیت رکھنے والی ملکی پیداوار میں تبدیل کرنا ہے۔ وفاقی وزارت صنعت کے مطابق گاڑیاں بنانے والے اداروں سے تقریباً 2.72 ارب ڈالر برآمدات متوقع ہیں۔

انہوں نے کہا کہ یہ پالیسی وزیراعظم شہباز شریف کے برآمدات پر مبنی، خود انحصار اور مسابقتی معیشت کے وژن کی عکاسی کرتی ہے۔ اس میں مقامی صنعت کاروں کو بااختیار بنانے، ملکی سطح پر آٹو پارٹس کی پیداوار مضبوط کرنے، روزگار کے مواقع پیدا کرنے اور پاکستانی صنعت کو عالمی آٹو موٹیو سپلائی چین کا حصہ بنانے پر خصوصی توجہ دی گئی ہے۔ ان کا کہنا تھا کہ حکومت کا مقصد صرف گاڑیوں کی اسمبلنگ کو سہولت فراہم کرنا یا ٹیرف کے ذریعے تحفظ دینا نہیں، بلکہ ایسا پائیدار صنعتی نظام قائم کرنا ہے جس میں مقامی گاڑیاں اور آٹو پارٹس تیار کرنے والے ادارے اپنی پیداواری صلاحیت میں اضافہ کر سکیں، جدید ٹیکنالوجی اپنا سکیں اور عالمی منڈیوں میں مقابلہ کر سکیں۔

نئی پالیسی میں مقامی ویلیو ایڈیشن میں بتدریج اضےزہ کو یقینی بنانے کے لیے لوکلائزیشن کی پابند شرائط متعارف کرائی گئی ہیں۔ ان لازمی شرائط کے ذریعے آٹو موٹیو مارکیٹ کی توسیع کو ملکی صنعتی سرگرمیوں، سرمایہ کاری، روزگار اور تکنیکی ترقی میں اضافے سے منسلک کیا جائے گا۔ مقامی ویلیو ایڈیشن کی مقررہ کم از کم شرائط پوری نہ کرنے کی صورت میں متعلقہ غیر مقامی طور پر تیار کردہ سی کے ڈی درآمدات پر اگلے مالی سال میں کسٹمز ڈیوٹی میں اضافی تین فیصد پوائنٹس کا اضافہ کیا جائے گا، جو مقررہ قانونی طریقہ کار سے مشروط ہوگا۔

ہارون اختر خان نے بتایا کہ پاکستان میں تقریباً 2,200 آٹو پارٹس تیار کرنے والے ادارے کام کر رہے ہیں جن کی پیداواری صلاحیت، تکنیکی ترقی اور عالمی سپلائی چین میں شمولیت آٹو موٹیو شعبے کی طویل مدتی مسابقت کے لیے نہایت اہم ہے۔ انہوں نے کہا کہ 2.1 ارب روپے کی مختص رقم سے وینڈر اپ گریڈیشن اینڈ ٹیکنالوجی ٹرانسفر پروگرام شروع کیا جائے گا، جس پر انجینئرنگ ڈیولپمنٹ بورڈ اور سمیڈا کے ذریعے عمل درآمد کیا جائے گا۔ اس پروگرام کے تحت مقامی وینڈرز کو جدید ٹیکنالوجی کے حصول، مشترکہ پیداواری سہولیات تک رسائی، ہنرمندی کی ترقی، بین الاقوامی معیار کے سرٹیفکیشن اور برآمدات کے لیے تیاری میں معاونت فراہم کی جائے گی۔

مشیر صنعت نے کہا کہ پالیسی کے تحت اس کی مدت کے دوران کم از کم پانچ بڑے آٹو پارٹس مینوفیکچرنگ اداروں میں سرمایہ کاری کا ہدف بھی مقرر کیا گیا ہے، تاکہ مقامی صنعتی کلسٹرز کو ترقی دی جا سکے۔ برآمدات کے فروغ کے حوالے سے انہوں نے بتایا کہ 2026 سے 2031 کے دوران مجموعی طور پر تقریباً 6 ارب ڈالر کی برآمدات کا ہدف مقرر کیا گیا ہے، جس میں سے تقریباً 3.29 ارب ڈالر یعنی 55 فیصد آٹو پارٹس مینوفیکچررز سے حاصل کرنے کا ہدف ہے، جبکہ گاڑیاں تیار کرنے والے اداروں سے تقریباً 2.72 ارب ڈالر یعنی 45 فیصد کی برآمدات متوقع ہیں۔

برآمد کنندگان کی حوصلہ افزائی کے لیے پالیسی میں ڈرا بیک آف لوکل ٹیکسز اینڈ لیویز اسکیم متعارف کرائی گئی ہے، جس کے تحت اہل برآمد کنندگان کو خالص فری آن بورڈ برآمدی مالیت پر 5 فیصد معاونت فراہم کی جائے گی، جبکہ مقررہ شرائط کے تحت اضافی برآمدات پر مزید 10 فیصد مراعات بھی دی جائیں گی۔ ہارون اختر خان نے کہا کہ مینوفیکچررز کو اپنے بین الاقوامی شراکت داروں کی عالمی سپلائی چین میں برآمدی مواقع حاصل کرنا بھی لازمی ہوگا تاکہ وہ صرف ملکی منڈی پر انحصار کے بجائے پائیدار برآمدات پر مبنی کاروباری ماڈل اپنا سکیں۔ انہوں نے مزید کہا کہ حکومت پانچ سال کے دوران کسٹمز ڈیوٹی کو بتدریج معقول بنا رہی ہے، تاہم اس بات کو یقینی بنایا گیا ہے کہ درآمدی مراعات براہ راست مقامی مینوفیکچرنگ، لوکلائزیشن اور برآمدی کارکردگی سے منسلک ہوں۔